నేడే నాని సుబ్రమణ్యం పాటల సందడి

Posted: 02/21/2015 12:06 PM IST

నాని హీరోగా నాగ్ అశ్విన్ దర్శకత్వంలో తెరకెక్కుతున్న తాజా చిత్రం ‘ఎవడే సుబ్రమణ్యం’. స్వప్న సినిమా పతాకంపై ప్రియాంక దత్ నిర్మిస్తున్న ఈ చిత్రంలో నాని సరసన మలయాళ కుట్టి మాళవిక నాయర్ హీరోయిన్ గా తెలుగులోకి ఎంట్రీ ఇస్తోంది.

రాధన్ సంగీతం అందిస్తున్న ఈ చిత్ర ఆడియో విడుదల కార్యక్రమం నేడు హైదరాబాద్ లో జరుగనుంది. విభిన్న కథాంశంతో తెరకెక్కుతున్న ఈ చిత్రంపై నాని భారీ ఆశలే పెట్టుకున్నాడు. ఈ సినిమా ట్రైలర్ కాస్త భిన్నంగా ఉండడం వల్ల అందరిని ఆకట్టుకొంటుంది. అలాగే హిమాలయాల్లోని పలు కొత్త ప్రదేశాల్లో ఈ సినిమా షూట్ చేసినట్లుగా కనిపిస్తోంది.

ప్రేమ, జీవితం, స్నేహం గురించి ఓ కుర్రాడు తెలుసుకోవడానికి మొదలు పెట్టె ప్రయాణంలో... తనకు ఎలాంటి అనుభవాలు ఎదురయ్యాయి అనే కథాంశంతో తెరకెక్కింది. ఇందులో నాని సరసన రీతు వర్మ ఓ కీలక పాత్రలో నటిస్తోంది.

‘పిల్ల జమీందార్’ సినిమా తర్వాత నాని హీరోగా నటించిన ఏ ఒక్క చిత్రం కూడా విజయం సాధించలేదు. వరుసగా అన్ని సినిమాలు అట్టర్ ఫ్లాప్ అయ్యాయి. పైగా నాని నటించిన ‘జెండాపై కపిరాజు’ చిత్రం ఇంకా విడుదలకు నోచుకోవడం లేదు. మరి ఈ సినిమా ఎలాంటి విజయం అందించనుందో త్వరలోనే తెలియనుంది.