కన్ఫర్మ్: బోయపాటి దర్శకత్వంలో రేసుగుర్రం కాంబినేషన్

Posted: 02/14/2015 12:08 PM IST

‘లెజెండ్’ సినిమా తర్వాత బోయపాటి శ్రీను దర్శకత్వంలో బెల్లంకొండ శ్రీనివాస్ హీరోగా ఓ సినిమా రూపొందనుందని తెలిసిందే. ఇందుకు సంబంధించిన చిత్ర ముహూర్త కార్యక్రమాలు కూడా ఘనంగా జరిగాయి. అయితే బడ్జెట్ సమస్య వల్ల ఈ ప్రాజెక్టును పక్కన పెట్టినట్లుగా తెలిసింది.

బోయపాటి శ్రీను మాత్రం బెల్లంకొండ శ్రీనివాస్ సినిమా కోసమే ఎదురుచూడకుండా తన కొత్త చిత్రానికి సిద్ధమయ్యాడు. బోయపాటి దర్శకత్వంలో అల్లు అర్జున్ హీరోగా ఓ చిత్రం రూపొందనుందని గతంలో వార్తలొచ్చాయి. కానీ ఈ వార్తలు నిజమేనని తెలిసింది. ప్రస్తుతం త్రివిక్రమ్ దర్శకత్వంలో బన్నీ హీరోగా నటిస్తున్న ‘సన్నాఫ్ సత్యమూర్తి’ చిత్ర షూటింగ్ చివరి దశకు చేరుకుంది.

ఈ సినిమా తర్వాత బోయపాటి దర్శకత్వంలో బన్నీ ఓ సినిమా చేయనున్నాడు. ప్రస్తుతం ఈ చిత్రానికి సంబంధించిన స్క్రిప్ట్ పనులు శరవేగంగా జరుగుతున్నాయి. వచ్చే నెల చివరి వారంలో ఈ ప్రాజెక్టు సెట్స్ పైకి వెళ్లనుంది. ఈ చిత్రానికి థమన్ సంగీత దర్శకుడిగా ఖరారు చేసారు.

థమన్, బన్నీ కాంబినేషన్ లో ఇప్పటికే ‘రేసుగుర్రం’ అనే బ్లాక్ బస్టర్ హిట్ చిత్రం వచ్చింది. కానీ బోయపాటి-థమన్, బోయపాటి-బన్నీల కాంబినేషన్ మాత్రం మొదటిసారి కావడంతో ఈ సినిమాపై భారీ అంచనాలే నెలకొన్నాయి. త్వరలోనే అన్ని వివరాలు అధికారికంగా ప్రకటించనున్నారు.