వేధించిన పోకిరీలపై విరుచుకుపడ్డ అనుష్క..

Posted: 02/06/2015 11:11 AM IST

Anushka sharma nt10 movie trailer bollywood news women rape incident

ఈమధ్య మహిళలపై అత్యాచారాలు మరింతగా పెరిగిపోతున్నాయి. చిన్నాపెద్దా అని తేడాలేకుండా మహిళలపై మగాళ్లు మృగాల్లాగా వ్యవహరిస్తున్నారు. ఇటువంటి వారికి బుద్ధిచెప్పేందుకు ప్రభుత్వం ఎన్ని చట్టాలు తీసుకొచ్చినప్పటికీ.. ఫలితం లేకపోయింది. ఓవైపు దేశం సాంకేతికపరంగా దూసుకుపోతుంటే.. మరోవైపు ఈ దారుణాల సంఖ్య రెట్టింపవుతోంది. తరుచూ జరుగుతున్న ఈ దారుణాలను అణిచివేసే దిశగా మహిళల్లో స్ఫూర్తిని పెంచుతూ కొందరు తమవంతు సహాయాన్ని అందిస్తున్నారు. మహిళల్లో ఆత్మబలం పెంపొందించేందుకు కొందరు తారలుసైతం ముందుకు వస్తున్నారు. ఈ కోవలోనే అనుష్క శర్మ కూడా పయనిస్తోంది. మహిళలు ఒంటరిగా వున్న సమయంలో పోకిరీలను ఎలా ఎదుర్కోవాలన్న అంశంతో ఈ అమ్మడు ఓ బలమైన కథతో తెరముందుకు వచ్చేందుకు సన్నాహాలు చేస్తున్నట్లు కనిపిస్తోంది.

బాలీవుడ్ నటి అనుష్క శర్మ ప్రస్తుతం ‘NH10’ అనే మూవీలో నటిస్తోంది. నిన్నటివరకు గ్లామర్ పాత్రలతో ప్రేక్షకులను మెస్మరైజ్ చేసిన ఈ భామ.. ఈసారి మహిళల్లో ఆత్మబలం పెంపొందించే దిశగా ఈ మూవీలో యాక్షన్ లేడిగా కనిపించనుంది. ఇప్పటికే ఈ మూవీకి సంబంధించిన విడుదలైన ఫస్ట్ లుక్ పోస్టర్లలో యాంగ్రీ యాక్షన్ లేడిగా దర్శనమిచ్చింది. ఆ ఫోటోలకు ప్రేక్షకులకు అనూహ్య స్పందన లభించింది. అందులో ఆమె గెటప్ అదుర్స్ అంటూ బాలీవుడ్ మొత్తం కితాబిచ్చింది. ఇప్పుడు తాజాగా ఈ మూవీ ట్రైలర్ విడుదలయ్యింది. ఈ ట్రైలర్ విడుదలైన కొన్ని గంటల్లోనే పాజిటివ్ రెస్సాన్స్’తో పొందడంతోపాటు.. అనుష్క ఇటువంటి కథాంశాన్ని ఎంచుకోవడంపై ప్రశంసలు కురిపిస్తున్నారు. ఎందుకంటే.. ఈ ట్రైలర్’లో ఆమె యాక్షన్ సన్నివేశాలు అందరినీ అబ్బురపరిచే విధంగా వున్నాయి మరి!

ఇక ఈ ట్రైలర్’లోనే దాదాపు కథ మొత్తం రివీల్ చేసినట్లు తెలుస్తోంది. ఈ మూవీలో అనుష్కకు జోడిగా నటిస్తున్న నీల్.. ఇద్దరూ కలిసి ఓ టూర్’కు వెళ్తారు. అందులో భాగంగానే కాసేపు సేద తీర్చుకోవడానికి ఇద్దరూ ఓ ఢాబా దగ్గర ఆగుతారు. అయితే.. ఆ ఢాబా దగ్గరే ఎవరో కొంతమంది పోకిరోళ్లు వచ్చి ఒక అమ్మాయిని వేధిస్తుంటారు. ఆమెను బలవంతంగా తీసుకెళుతుంటారు. ఈ మొత్తం దృశ్యాన్ని గమనించిన అనుష్క, నీల్.. వారిని అడ్డుకోవడానికి ప్రయత్నం చేస్తారు. కానీ.. వాళ్లు వీరిని దెబ్బకొట్టి అక్కడి నుంచి వెళ్లిపోతారు. అక్కడితో ఓటమి ఒప్పుకోని ఈ జంట.. ఆ ఆకతాయిలు చేస్తున్న ఆకృత్యాలను తెలుసుకునేందుకు ప్రయత్నిస్తారు. ఈ నేపథ్యంలో నీల్’ను అనుష్క పోగొట్టుకుంటుంది. అందుకు ప్రతీకారంగా అనుష్క ఆ పోకిరీగాళ్లకు ఎలాంటి బుద్ధి చెప్పిందనే కథాంశంతో రూపొందినట్లు తెలుస్తోంది.

ఈ విధంగా యాక్షన్’తో కూడిన ట్రైలర్’ను వీక్షించిన కొందరు.. ఈ మూవీ మహిళల్లో ఆత్మబలం పెంపొందించేందుకు వారిలో స్ఫూర్తిని కలిగిస్తుందని అభిప్రాయం వ్యక్తం చేస్తున్నారు. ఇదిలావుండగా.. ప్రస్తుతం పోస్ట్ ప్రొడక్షన్ పనులు చివరు దశకు చేరుకోవడంతో అనుష్క ఈ మూవీని ప్రచారం చేసే పనుల్లో నిమగ్నమైంది. సొంతంగా ప్రొడక్షన్ హౌస్ ఏర్పాటు చేసి, ఆ బ్యానర్లోనే ఈ మూవీని అనుష్క శర్మ రూపొందిస్తోంది. నవదీప్ సింగ్ దర్శకత్వ వహించిన ఈ చిత్రాన్ని వచ్చే నెల 6వ తేదిన విడుదల చేయడానికి సన్నాహాలు చేస్తున్నారు.