ఆపండెహ్.. ఆలూ లేదు చూలూ లేదు!

Posted: 02/05/2015 04:12 PM IST

గతకొన్నాళ్ల నుంచి సెక్సీ బ్యూటీ షకీలా పెళ్లి చేసుకుందంటూ మీడియాలో జోరుగా ప్రచారాలు సాగాయి. 28 ఏళ్ల యువకుడితో ఈ అమ్మడు పెళ్లి చేసుకున్నట్లు ఫోటోలు కూడా విడుదలయ్యాయి. దీంతో ఈ వార్తలు నిజమేనని అంతా అనుకున్నారు. పైగా.. షకీలా కూడా ఈ వార్తలపై సైలెంట్’గా వుండటంతో ఆ అనుమానాలు మరింత బలపడ్డాయి. ఇక అంతే! ఈ పెళ్లి వార్తలు మరింత జోరందకున్నాయి. ఈ విషయం అలాఇలా ఎగురుతూ చివరికి షకీలా చెవిన పడింది. దాంతో ఖంగుతిన్న ఈ భామ.. తన పెళ్లి వార్తలపై ఓ క్లారిటీ ఇచ్చింది.

సోషల్ మీడియాలో చక్కర్లు కొడుతున్న తన పెళ్లి వార్తలపై షకీలా స్పందిస్తూ.. అదంతా అబద్ధమని కొట్టిపారేసింది. అలాగే తనకు పెళ్లయినట్లుగా విడుదలైన ఫోటోలో వున్న ఆ 28 ఏళ్ల యువకుడు తాను తెరకెక్కిస్తున్న సినిమాలో హీరో అని వివరించింది. తాను డైరెక్ట్ చేస్తూ నటిస్తున్న సినిమాలో అదొక సన్నివేశమని ఈమె స్పష్టం చేసింది. పైగా.. అతడు తనకు తమ్ముడు లాంటివాడని, తనకిప్పుడు పెళ్లి అవసరమేముందని తిరిగి ప్రశ్నిస్తోంది. ఏదైతేనేం.. ఈ పెళ్లి వార్తలతో షకీలా మరోసారి టాక్ ఆఫ్ ది టౌన్’గా నిలిచిపోయింది.

ఇదిలావుండగా.. షకీలా మొదటిసారిగా దర్శకురాలిగా మెగాఫోన్ పట్టిన విషయం విదితమే! తెలుగు, హిందీ భాషల్లో ఆమె ఓ సినిమాను తెరకెక్కిస్తుంది. మహిళలపై జరుగుతున్న అత్యాచారాలు చేసే మృగాళ్ళకు బుద్ధి చెప్పే కథాంశంతో ఉంటుందని, తాను కూడా ఓ చిన్న పాత్రలో నటిస్తున్నట్లు గతంలో షకీలా పేర్కొంది. ఇప్పుడు తాజాగా విడుదలైన ఫోటో కూడా ఆ మూవీలోని ఓ సన్నివేశంలో భాగమేనంటూ చెప్పుకుంటున్నారు. మరోవైపు.. ఈమె అనాథ పిల్లలకు ప్రతీనెల కొంత సాయం చేస్తున్నట్లుగా తెలిపింది.

AS