బాహుబలి వీడియో లీక్ చేసిన వర్మ అరెస్ట్

Posted: 01/31/2015 04:08 PM IST

తెలుగు సినీ అభిమానులెంతగానో ఎదురుచూస్తున్న ‘బాహుబలి’ సినిమాలోని 13నిమిషాలు నిడివి గల ఓ వీడియో ఇటీవలే లీకయ్యిన విషయం తెలిసిందే. ఈ విషయంపై చిత్ర దర్శక,నిర్మాతలు చాలా సీరియస్ గా వుండి, పోలీసులకు ఫిర్యాదు చేయడంతో... పోలీసులు కూడా ఆ లీకేజ్ మాస్టర్ ను త్వరగానే పట్టుకోగలిగారు.

ఈ వీడియో మకుట విజువల్ ఎఫెక్ట్స్ అనే సంస్థ నుంచి లీకైనట్లుగా పోలీసులు గుర్తించారు. మకుట విజువల్ ఎఫెక్ట్స్లో పని చేస్తున్న వర్మ అనే వ్యక్తిని పోలీసులు అదుపులోకి తీసుకొని విచారించారు. పైగా విజువల్‌ ఎఫెక్ట్స్‌ కంపెనీకి వర్మనే మేనేజర్‌ కావడంతో... పోస్ట్ ప్రొడక్షన్ సమయంలో వీడియో ఫుటేజీని దొంగలించి, ఆ తర్వాత యూట్యూబ్ ద్వారా ఆ వీడియోను ఇంటర్నెట్ లో అప్ లోడ్ చేసినట్లుగా పోలీసులు నిర్దారణకు వచ్చారు.

మరి ఈ విషయంపై దర్శకుడు రాజమౌళి, నిర్మాతలు శోభు యార్లగడ్డ ఎలా స్పందించనున్నారో తెలియనుంది. భారీ బడ్జెట్ తో తెరకెక్కుతున్న ఈ చిత్రంలో ప్రభాస్, రానా, అనుష్క, తమన్నా ప్రధాన పాత్రలలో నటిస్తున్నారు. కీరవాణి సంగీతం అందిస్తున్నారు.