అల్లుడుశీనుతో బోయపాటి మొదలెట్టేసాడు

Posted: 08/27/2014 11:21 AM IST

బెల్లంకొండ సురేష్ తనయుడు సాయిశ్రీనివాస్ హీరోగా నటించిన తొలి చిత్రం ‘అల్లుడుశీను’ ఇటీవలే విడుదలై ఘనవిజయం సాధించిన విషయం తెలిసిందే. వి.వి.వినాయక్ దర్శకత్వంలో తెరకెక్కిన ఈ చిత్రంలో సమంత హీరోయిన్ గా నటించింది. తమన్నా ఐటెం సాంగులో నటించింది. దేవిశ్రీప్రసాద్ సంగీతం అందించాడు. ఈ సినిమా సాయిశ్రీనివాస్ కు మంచి హిట్టును అందించింది.

‘అల్లుడుశీను’ తర్వాత సాయిశ్రీనివాస్ హీరోగా మరో చిత్రం తెరకెక్కుతుంది. ప్రముఖ మాస్ డైరెక్టర్ బోయపాటి శ్రీనివాస్ దర్శకత్వంలో ఓ చిత్రం ప్రారంభం కానుంది. శ్రీ లక్ష్మీనరసింహ ప్రొడక్షన్స్ బ్యానర్లో, బెల్లంకొండ సురేష్ సమర్పణలో నిర్మాత బెల్లంకొండ గణేష్ నిర్మిస్తున్న ఈ చిత్ర ముహూర్త కార్యక్రమాలు ఈరోజు ఘనంగా జరిగాయి.

ఈ కార్యక్రమానికి తెలుగు ఇండస్ట్రీ సినీ పెద్దలు విచ్చేసి, చిత్ర యూనిట్ కు శుభాకాంక్షలు తెలియజేసారు. ప్రముఖ దర్శకుడు కె.రాఘవేంద్ర రావు క్లాప్ కొట్టారు. ‘అల్లుడుశీను’ సినిమాలో ఐటెం సాంగులో నటించిన తమన్నా... ఈ సినిమాలో సాయి సరసన హీరోయిన్ గా నటించనుంది.

సాయి మొదటి సినిమాకు సూపర్ హిట్ సాంగ్స్ ను అందించి, సినిమా విజయానికి మూలకారకుడిగా నిలచిన సంగీత దర్శకుడు దేవిశ్రీప్రసాద్ ఈ చిత్రానికి కూడా సంగీత దర్శకత్వం వహిస్తున్నాడు. త్వరలోనే ఈ చిత్రం సెట్స్ పైకి వెళ్లనుంది. ఈ చిత్రానికి సంబంధించిన మరిన్ని వివరాలు త్వరలోనే తెలియనున్నాయి.