రిలీజ్ కు ముందే బాహుబలి రికార్డులు

Posted: 08/11/2014 06:33 PM IST

Bahubali records in overseas distribution

ప్రస్తుతం టాలీవుడ్ లో ఎవరి నోట విన్నా ఒకటే పేరు విన్పిస్తోంది. అదే బాహుబలి. సంచలనాలను క్రియేట్ చేయటంలో తనకు తానే సాటిగా నిలిచిన రాజమౌళి తెరకెక్కిస్తున్న ఈ సినిమా విడుదలపై అందర్లో ఆసక్తి నెలకొంది. రెండు సంవత్సరాల రాజమౌళి కష్టం ఎలా ఉంటుందో చూడాలని అభిమానులంతా ఎదురు చూస్తున్నారు. వచ్చే ఏడాది విడుదలకు సిద్దమవుతున్న ఈ సినిమా టాలీవుడ్ రికార్డులను విడుదలకు ముందే తిరగరాస్తోంది.

ఇప్పటికే భారీ అంచనాలతో, సంచలనాలు నమోదు చేస్తున్న బాహుబలి తాజాగా ఓవర్సీస్ డిస్ర్టిబ్యూషన్ లో రికార్డు సృష్టించింది. గతంలో ఎన్నడూ లేనంతగా 9కోట్లను వసూలు చేసింది. సినిమా తొలి పార్ట్ కే ఈ మొత్తం రావటంతో సినిమా విడుదలయితే నిర్మాతల పంట పండినట్లే అని ఫిలింనగర్ టాక్. అన్నట్లు ఈ సినిమాకు ప్రసాద్ దేవినేని, శోభు యార్లగడ్డ నిర్మాతలుగా ఉన్నారు. తాజా వసూళ్ళతో వీరు లాబాలను వెనకేసుకుంటున్నారు. సినిమా తొలి పార్ట్ వచ్చే సంవత్సరం ఏప్రిల్ 17న విడుదల అవుతుంది. తొలి పార్ట్ కే ఈ స్థాయి కలెక్షన్లుంటే, తర్వాతి పార్ట్ వస్తే పండగ చేసుకోవచ్చని అటు సినిమా యూనిట్, ఇటు అభిమానులు అంచనాలు వేసుకుంటున్నారు.

ప్రభాస్ హీరోగా వస్తున్న ఈ సినిమాలో అనుష్క, తమన్నా హీరోయిన్లుగా నటిస్తున్నారు. వీరితో పాటు దగ్గుబాటి రాణా, రమ్యకృష్ణ తదితరులు ముఖ్య పాత్రల్లో ఉన్నారు. ఎం. ఎం. కీరవాణి సంగీతమందిస్తున్నారు. ఇప్పటికే ఈ సినిమాపై భారీ అంచనాలు నెలకొనటంతో ఏప్రిల్ 17కోసం అభిమానులు వేయి కళ్ళతో ఎదురుచూస్తున్నారు.

RK