Posted: 08/01/2012 01:52 PM IST

        'అల్లరి'నరేష్‌, రిచాపనయ్‌ జంటగా ఫ్రెండ్లీ మూవీస్‌ పతాకంపై రూపొందుతున్న సోషియో ఫాంటసీ చిత్రం షెడ్యూల్‌ నిన్నటితో పూర్తయింది. ఇ.సత్తిబాబు దర్శకుడు. ఈ చిత్రం కోసం రామోజీ ఫిలింసిటీలో స్టంట్‌ మాస్టర్‌ గణష్‌ సారథ్యంలో కొన్ని ఫైట్‌ సన్నివేశాలను మంగళవారం వరకు చిత్రీకరించారు. ఈ విషయాన్ని నిర్మాత చంటి అడ్డాల తెలియజేసారు.  ఈ చిత్రం కోసం యముడి ఇంటిసెట్‌, దర్బార్‌ సెట్‌, బృందావనం వంటి 11 సెట్స్‌ నిర్మించి, వాటిలో షూటింగ్‌ చేశామని తెలిపారు. ప్రస్తుతం జరిగిన షెడ్యూల్‌తో సెట్స్‌ చిత్రీకరణ మొత్తం పూర్తయిందని చెప్పారు.
       ఆగస్టు 10 నుంచి పాలకొల్లు, ఆ పరిసరాల్లో తాజా షెడ్యూల్‌ను మొదలుపెడతామని అన్నారు. అందులో భాగంగా ప్రధాన తారాగణంపై కీలక సన్నివేశాలను చిత్రీకరించడంతో పాటు గోదావరి ఐలాండ్‌లో ఓ సెట్‌ను నిర్మించి, అందులో ఓ పాటను చిత్రీకరిస్తామని ఆయన వివరించారు. ఆ తర్వాత హైదరాబాద్‌లో ఓ పాటను, విదేశాల్లో మరో పాటను తియ్యడంతో షూటింగ్‌ పార్ట్‌ పూర్తవుతుందని ఆయన చెప్పారు. దర్శకుడు సత్తిబాబు మాట్లాడుతూ, అద్భుతమైన సెట్స్‌తో పాటు గ్రాఫిక్స్‌ ఈ చిత్రానికి ఓ ప్రత్యేక ఆకర్షణగా నిలుస్తాయని అన్నారు. కోటి అద్భుతమైన బాణీలను అందించారని, ఆయన స్వరపరిచిన ఐదు పాటలు సంగీత ప్రియులను అలరింపజేస్తాయని చెప్పారు. నరేష్‌తో పాటు తమకందరికీ ఇది ఓ విభిన్న చిత్రమవుతుందని అన్నారు. యముడిగా షియాజీషిండే, అతని భార్యగా రమ్యకృష్ణ నటిస్తున్నారని ఆయన తెలిపారు.
       ఇంకా, చిత్రంలోని ఇతర పాత్రలలో సుమన్‌, నరేష్‌, కోట శ్రీనివాసరావు, బ్రహ్మానందం,ఎం.ఎస్‌.నారాయణ, చలపతిరావు, తదితరులు నటిస్తున్నారు. సంగీతం: కోటి, ఛాయాగ్రహణం: కె.రవీంద్రబాబు.

...avnk