Posted: 07/04/2012 09:07 PM IST

      అందాల శ్రీదేవి పద్నాలుగేళ్ళ విరామం తర్వాత మళ్లీ వెండితెరమీద సాక్షాత్కరిస్తుంది. ఆమె నటిస్తున్న 'ఇంగ్లిష్ వింగ్లిష్' చిత్రం తెలుగు వెర్షన్ కి సంబంధించిన ఫస్ట్ లుక్ ను విడుదల చేశారు. ఈ నెల 6 నుంచి ఈ చిత్రం ట్రైలర్ను 'ఈగ' సినిమా ప్రదర్శితమయ్యే దియేటర్లలో ప్రదర్శించడం జరుగుతుందని చిత్ర నిర్మాతలు చెబుతున్నారు. చిత్ర నిర్మాతల్లో ఒకరైన ఆర్.బాల్కీ మాట్లాడుతూ, ఇది శ్రీదేవి మాత్రమే చేయగల పాత్ర అన్నారు. ఇంగ్లిష్ తెలియని ఓ పల్లెటూరి యువతి ఆ భాష నేర్చుకుని, అది ఎంత సులువైనదో ప్రపంచానికి చాటి చెబుతుందని ఆయన తెలిపారు.

     ఈ మూవీ ఫస్ట్ లుక్ లో శ్రీదేవి స్టైల్ చాలా ఆకర్షణీయంగా ఉంది.  సెప్టెంబర్ 21 న ప్రపంచ వ్యాప్తంగా హిందీ, తెలుగు, తమిళ భాషల్లో దీనిని ఒకేసారి విడుదల చేస్తామన్నారు. ఇందులో ఓ ప్రముఖ తెలుగు హీరో ముఖ్య పాత్ర పోషిస్తున్నారని నిర్మాతలు చెప్పారు. అయితే, ఆ నటుడి పేరును మాత్రం వెల్లడించలేదు. గౌరీ షిండే ఈ చిత్రానికి దర్శకత్వం వహిస్తున్నారు.
       ఇదిలా ఉండగా, అందాలభామ భూమిక టాలీవుడ్‌లో రీ-ఎంట్రీ ఇస్తోంది. పెళ్ళి తర్వాత సినిమాలు తగ్గించుకుని అరకొర సినిమాలే చేసిన భూమిక ఇప్పుడు 'ఏప్రిల్‌ఫూల్‌' అనే సినిమాతో మళ్ళీ ప్రేక్షకుల ముందుకు రాబోతోంది. జగపతిబాబు హీరోగా నటిస్తున్న ఈ సినిమాను కృష్ణస్వామి శ్రీకాంత్‌ అయ్యంగర్‌ దర్శకత్వంలో జి.ఎల్‌. శ్రీనివాస్‌ నిర్మిస్తున్నారు. సోషియో ఫాంటసీ, హాస్యంతో తెరకెక్కబోతున్న ఈ సినిమాకు 'ఏప్రిల్‌ఫూల్‌' అనేదే తగిన టైటిల్‌ అని దర్శకుడు చెబుతున్నారు.
        ఈ సినిమా టైటిల్‌ను అనౌన్స్‌ చేసిన సందర్భంగా సినీ ప్రముఖులు రమేశ్‌ ప్రసాద్‌, సి.కళ్యాణ్‌, తమ్మారెడ్డి భరద్వాజ, బెల్లంకొండ సురేశ్‌, లక్ష్మీ ప్రసన్న తదితరులు యూనిట్‌ సభ్యులకు శుభాకాంక్షలు తెలిపారు.

...avnk