Posted: 04/12/2012 01:49 PM IST

              మెగాపవర్ స్టార్ రామ్ చరణ్ నటించే తొలి హిందీ చిత్రం షూటింగు ఇవాళ ప్రారంభమైంది. ప్రస్తుతం ముంబయ్ లో రామ్ చరణ్ పై కొన్ని సన్నివేశాల చిత్రీకరణ జరుగుతోంది. దీని గురించి చరణ్ ట్వీట్ చేస్తూ, జంజీర్ చిత్రం తొలి షెడ్యులు షూటింగు మొదలైందనీ, మంచి టీమ్ తో వర్క్ చేస్తున్నాననీ, ఈ సందర్భంగా అందరి ఆశీస్సులూ కావాలనీ ఆకాంక్షించాడు. ఇటీవల విడుదలైన ‘రచ్చ’ మూవీ కలెక్షన్ల పరంగా మాంచి దూకుడు మీద ఉండటంతో చరణ్ చాలా ఉత్సాహంగా షూటింగ్ లో కనిపిస్తున్నాడని సమాచారం.
               కాగా, రామ్ చరణ్ సరసన 'జంజీర్' లో బాలీవుడ్ భామ ప్రియాంకా చోప్రా సందడి చేయబోతోంది.  ఈ చిత్రంలో హీరోయిన్ గా ప్రియాంకా నటించనుందన్న విషయం ఇంతకుముందే వెల్లడించాం. నిన్ననే ఈ చిత్రానికి ప్రియాంకా సంతకం చేసిందని సమాచారం. ఇందుకు గాను ఆమెకు 6 కోట్ల పారితోషికాన్ని ఇస్తున్నారట. ప్రియాంకా కూడా త్వరలో ఈ షూటింగులో జాయిన్ కానుంది. చరణ్ బాలీవుడ్ తెరకు కొత్త కాబట్టి, సినిమాకు బిజినెస్ పరంగా క్రేజ్ రావడం కోసం బాలీవుడ్ పాపులర్ స్టార్ ప్రియాంకాను బుక్ చేసినట్టు భోగట్టా.
            నాలుగు దశాబ్దాల క్రితం గతంలో అమితాబ్ బచ్చన్ హీరోగా నటించిన 'జంజీర్' సూపర్ హిట్ సినిమాను చరణ్ హీరోగా, అపూర్వ లఖియా దర్శకత్వంలో రీమేక్ చేస్తున్న సంగతి మనకు తెలిసిందే. సినిమాలోని విలన్ పాత్రయిన ధరం దయాళ్ తేజ క్యారెక్టర్లో ప్రకాష్ రాజ్, మోనా డార్లింగ్ పాత్రలో మహీగిల్ నటిస్తున్నారు. హిందీ, తెలుగు భాషల్లో ఈ చిత్రం నిర్మితమౌతోంది.

...avnk