Posted: 01/17/2012 05:43 PM IST

శివరాత్రికి విడుదలవటానికి అధినాయకుడు చిత్రం సిద్దమౌతోంది. పరుచూరి మురళి రూపొందిస్తున్న ఈ చిత్రంలో బాలకృష్ణ మూడు రూపాల్లో కనిపించబోతున్నారు. యువ హీరోగానూ, ఆ హీరో తండ్రిగానూ, ఆ హీరో తాతగానూ బాలకృష్ణ తన విశ్వరూపాన్ని చూపించబోతున్నారు. పూర్తి స్థాయి మసాలా దట్టించి వదులుతున్న ఈ సినిమాకు బాలకృష్ణే ఊపిరిపోయాలి.

అధినాయకుడులో బాలకృష్ణ సరసన లక్ష్మీరాయ్, సలోనిలు శృంగారాన్ని ఒలకబోయటానికి పూనుకున్నారు. అలనాటి సహజ నటి జయసుధ కూడా ఈ చిత్రంలో ఒక ప్రముఖపాత్రను పోషిస్తున్నారు. ఈ మధ్య అగ్ర హీరోల చిత్రాలను విడుదల చేస్తున్న శైలిలో ఇంతవరకూ బాలకృష్ణ సినిమాలలో దేన్నీ చెయ్యని విధంగా ఈ సినిమాను భారీగా విడుదల చెయ్యాలనుకుంటున్నారు చిత్ర నిర్మాతలు. అదే జరిగితే బాలయ్య సినీ జీవితంలోనే ఇది ఒక పెద్ద రిలీజ్ అవుతుంది.

సింహా తర్వాత, శ్రీరామరాజ్యం హిట్ కొట్టి, ఇప్పుడీ చిత్రాన్ని కూడా విజయవంతం చెయ్యటం జరిగితే హీరోయిన్లు బాలకృష్ణ సరసన చెయ్యనని అనకపోవచ్చు. అధినాయకుడు లో బాలయ్య రాజకీయ రంగ ప్రవేశానికి పనికి వచ్చే సంభాషణలు కూడా ఉండవచ్చని చిత్ర పరిశ్రమలో అనుకుంటున్నారు.

-శ్రీజ