ఐఫోన్-7 ఫొటోలు లీక్.. పెద్ద కెమెరాలు, కొత్త ఫీచర్లు..

Posted: 06/26/2016 02:45 PM IST

అగ్రరాజ్యం అమెరికాకు చెందిన ప్రముఖ ఎలక్ట్రానిక్స్ దిగ్గజ సంస్థ యాపిల్ నుంచి త్వరలో విడుదల చేయనున్న అత్యంత ప్రతిష్టాత్మక ఐఫోన్ 7, ఐఫోన్ 7 ప్లస్‌కు సంబంధించి మరిన్ని తాజా ఫొటోలు లీకయ్యాయి. సాధారణ స్మార్ట్ ఫోన్లతో సమానంగా ధర కలిగి, మధ్యతరగతి ప్రజలకు అండగా వుండేలా రూపోందిస్తున్న ఈ ఫోన్లలో మధ్య తరగతి స్మార్ట్ ఫోన్ ప్రియులను అకర్షించేలా కొత్త ఫీచర్లు కూడా వున్నాయని సమాచారం. గత మోడళ్లకు భిన్నంగా ఈ తాజా 7. 7ఎస్ రెండింటిలోనూ లార్జర్ కెమెరాలు ఉంటాయని తాజా ఫొటోలు స్పష్టం చేస్తున్నాయి.

ప్రస్తుతం ఆన్‌లైన్‌లో హల్‌చల్ చేస్తున్న ఈ ఫొటోలను గురించి 9టు5.కామ్ ఓ కథనాన్ని ప్రచురించింది. తాజా మోడళ్లలో ఎంటెన్నా లైన్స్ ను రీడిజైన్ చేసినట్టు వెల్లడించింది. 5.5 అంగుళాల తెరతో వస్తున్న ఐఫోన్ 7 ప్లస్‌లో డ్యుయెల్ కెమెరా కాంపొనెంట్ ఉంటుందని గతంలో కథనాలు రాగా.. తాజాగా లీకైన ఫొటోల్లో ఈ రెండు ఇన్నర్ కెమెరాల మధ్య సెంటిమీటర్ గ్యాప్ ఉంటుందని వెల్లడవుతోంది. అదేవిధంగా 4.7 అంగుళాల తెరతో రానున్న ఐఫోన్ 7లోనూ కెమెరా అప్‌గ్రేడ్ చేసినట్టు 9టు5.కామ్ వెల్లడించింది.