దీపావళి నాటికి భారతీయ విఫణిలోకి రిలయన్స్ జియో 4జీ ఫోన్లు

Posted: 10/21/2015 12:54 PM IST

బ్రాడ్‌బ్యాండ్ ఇంటర్‌నెట్‌తో దూసుకురావటానికి సన్నాహాలు చేస్తున్న రిలయన్స్ జియో... 4జీ ఇంటర్‌నెట్ సేవలకన్నా ముందు తన బ్రాండ్‌తో మొబైల్ హ్యాండ్‌సెట్లను మార్కెట్లోకి విడుదల చేయటానికి సిద్ధమవుతోంది. లైఫ్(ఎల్‌వైఎఫ్) బ్రాండ్‌తో ఈ నెల 28 నుంచి దేశవ్యాప్తంగా మొబైల్ ఫోన్లను విక్రయించడానికి ఏర్పాట్లు జరుగుతున్నట్లు విశ్వసనీయంగా తెలిసింది. దేశవ్యాప్తంగా 1,50,000కుపైగా వివిధ రిటైల్ ఔట్‌లెట్లలో ఇవి లభిస్తాయి. రిలయన్స్ జియో లైఫ్ బ్రాండ్‌తో తొలుత రూ.10 వేల శ్రేణిలో 5 మోడళ్లను ప్రవేశపెడుతోంది.

5 అంగుళాల స్క్రీన్, 2 జీబీ ర్యామ్ వీటి ప్రత్యేకతలు. నవంబర్‌లో రూ.4 వేలు ఆపై శ్రేణిలో మరిన్ని మోడళ్లను విడుదల చేయనున్నట్లు తెలిసింది. మొత్తమ్మీద రూ.4 వేలు- 25 వేల మధ్య ఈ ఫోన్లు లభిస్తాయి. వాస్తవానికి భారత స్మార్ట్‌ఫోన్ల మార్కెట్లో రూ.4-12 వేల శ్రేణిలో లభించే మోడళ్ల వాటా ఏకంగా 78 శాతం వరకూ ఉంది. అందుకే జియో సైతం ఈ శ్రేణి లో అధిక మోడళ్లను తేనున్నట్టు తెలుస్తోంది. మొత్తంగా 100 రోజుల్లో 10 కోట్ల యూనిట్లు విక్రయించాలని జియో లక్ష్యంగా పెట్టుకున్నట్లు సమాచారం. లక్ష్యాన్ని చేరుకోగానే వాణిజ్య పరంగా 4జీ సర్వీసులు ప్రారంభం అవుతాయి.

జి. మనోహర్