చర్మసమస్యలకు చెక్ పెట్టే చిట్కాలు...

Posted: 07/23/2015 11:48 AM IST

యుక్తవయస్సు వచ్చిన తర్వాత చర్మసంబంధిత సమస్యలు మొదలవుతాయి. అంటే.. మొటిమలు రావడం, నల్లని మచ్చలు ఏర్పడటం, చర్మం ముడతలు పడటం, ఇంకా ఎన్నో ఇబ్బందులు ఎదురవుతాయి. ఈ సమస్యల నుంచి ఉపశమనం పొంది చర్మసౌందర్యాన్ని మెరుగుపరుకోవాలంటే.. సాధారణ బ్యూటీ ప్రోడక్ట్స్ కంటే సహజమైన చిట్కాలు పాటిస్తే చాలు. చర్మసమస్యల్ని దూరం చేసుకోవడమే కాకుండా మెరుగైన నిగారింపును సొంతం చేసుకోవచ్చు. మరి.. ఆ చిట్కాలేంటో తెలుసుకుందామా...

* ప్రతిరోజూ ఉదయం ఒక గ్లాసు అల్లం రసాన్ని తాగితే.. అది ముఖంపై మొటిమలను దూరం చేస్తుంది. అంతేకాదు, ఆ రసాన్ని మాడుకు రాసుకుంటే రక్త ప్రసరణ బాగా జరగడంతో తలలో చుండ్రు మాయమవుతుంది. ఈ చిట్కాని నిత్యం పాటిస్తే.. అద్భుతమైన ప్రయోజనాల్ని పొందవచ్చు.

* ఒక పాత్ర తీసుకుని అందులో గుడ్డులోని తెల్లని సొన, అర టీ స్పూన్ మీగడ, కొద్దిగా నిమ్మరసం వేసి బాగా కలుపుకోవాలి. ఈ మిశ్రమాన్ని ముఖానికి రాసుకుని 15 నిమిషాల తర్వాత చల్లని నీటితో కడుక్కోవాలి. ఇలా రోజు విడిచి రోజు వేసుకుంటే.. చర్మం ముడతలు పడటం తగ్గుతుంది.

* ఒక గిన్నెలో రెండు టీ స్పూన్లు రోజ్ వాటర్, ఒక చుక్క గ్లిజరిన్, 2 చుక్కల నిమ్మరసం వేసి బాగా కలుపుకోవాలి. దూది ఉండతో ఈ మిశ్రమాన్ని ముఖానికి, మెడకు రాయాలి. ఇది చర్మానికి మంచి మాయిశ్చరైజర్‌లా పనిచేస్తుంది. అలాగే.. చర్మం ముడతలు పడకుండా మెరిసే సౌందర్యాన్ని అందిస్తుంది.

* ఒక పాత్రలో అరకప్పు క్యారెట్, ఉడికించిన బంగాళాదుంప గుజ్జు, చిటికెడు పసుపు, బేకింగ్ సోడా వేసి కలుపుకోవాలి. ఈ మిశ్రమాన్ని ముఖానికి రాసి కాసేపటి తర్వాత గోరు వెచ్చని నీటితో శుభ్రం చేసుకోవాలి. ఇలా రెగ్యులర్ గా చేస్తే.. ముడతలు తగ్గడమే కాకుండా చర్మం మృదువుగా తయారవుతుంది.

* ఒక బౌల్లో కొద్దిగా నిమ్మరసం, కొద్దిగా పెరుగు వేసి మిక్స్ చేసుకోవాలి. ఈ మిశ్రమాన్ని ముఖానికి అప్లై చేసి పూర్తిగా ఆరిన తర్వాత గోరువెచ్చని నీటితో ముఖం శుభ్రం చేసుకోవాలి. ఈ లెమన్ ఫేస్ ప్యాక్‌ను వారానికొకసారి అప్లై చేయడం వల్ల మీ చర్మం ఫెయిర్‌గా మారుతుంది.

* ఒక చెంచా గోధుమపిండి, రెండు చెంచాలా రోజ్ వాటర్ ఒక పాత్రలో వేసి పేస్టులా కలుపుకోవాలి. ఈ మిశ్రమాన్ని ముఖానికి పట్టించి 20నిముషాల తర్వాత శుభ్రం చేసుకోవాలి. ఇలా చేయడం వల్ల స్కిన్ కంప్లెక్షన్.. చర్మం రంగు మెరుగు అవుతుంది. గోరువెచ్చని పాలతో శుభ్రం చేస్తే మరింత ఉత్తమ ఫలితం పొందవచ్చు.

* తేనెను నేరుగా ముఖానికి అప్లై చేసి ముఖం మొత్తం మసాజ్ చేసి 20నిముషాల తర్వాత తడికాటన్ టవల్‌తో తుడిచేసి, తర్వాత గోరువెచ్చని నీటితో శుభ్రం చేసుకుంటే.. చర్మసమసల్ని దూరం చేసుకోవచ్చని బ్యూటీషన్లు అంటున్నారు.