వేసవిలో చర్మసౌందర్యాన్ని పెంపొందించే ‘సమ్మర్ బ్యూటీ టిప్స్’

Posted: 05/09/2015 03:24 PM IST

వేసవికాలం వచ్చిందంటే చాలు.. ఆరోగ్యంతోపాటు చర్మసౌందర్య సంబంధిత ఎన్నో సమస్యలు వస్తాయి. ముఖ్యంగా చర్మం నల్లగా మారడం, కంటికింద నల్లటి వలయాలు ఏర్పడటం, చెమట వల్ల ముఖంపై దుమ్ము-ధూళి చేరిపోయి అందివిహీనంగా కనిపించడం, ఇంకా ఎన్నోరకాల ఇబ్బందులు ఎదుర్కోవాల్సి వస్తుంది. ఇక సన్-టాన్ సమస్య అయితే వెంటాడుతుంటుంది.

సూర్యరశ్మి ప్రభావం వల్ల నల్లగా మారే ప్రదేశాలను ‘సన్ టాన్’ అంటారు. ఈ సన్ టాన్ నుంచి ఉపశమనం పొందాలంటే ఎన్నో జాగ్రత్తలు తీసుకోవాలి. సమ్మర్ లో ఇంకా ఎన్నో సౌందర్య సమస్యలు తలెత్తుతాయి. వాటి నుంచి ఉపశమనం పొంది, మళ్లీ సౌందర్యంగా మారాలంటే అందుకు అనుగుణంగా కొన్ని బ్యూటీ టిప్స్ అందుబాటులో వున్నాయి. వాటిని ఇంట్లోనే పాటిస్తే సరిపోతుంది. అవేంటో తెలుసుకుందామా..

1. ఫేస్ వాష్ : ఎండాకాలంలో ముఖం జిడ్డుగా మారుతుంది. దీనివల్ల ముఖం మీద దుమ్ము ధూళి పడి పాడైపోయే అవకాశం ఉంది. ఈ సమస్య నుంచి బయట పడాలంటే ప్రతి నాలుగు గంటలకు ఒకసారి ముఖాన్ని శుభ్రంగా వాష్ చేసుకుంటూ ఉండాలి. సోపు, ఫేస్ వాష్, క్రీమ్స్, లోషన్స్ వాడవచ్చు.

2. సన్‌స్క్రీన్‌ లోషన్‌ : ఇంటి నుంచి బయటికి వచ్చినప్పుడు ప్రతి అరగంటకొకసారి సన్ టాన్ నుంచి రక్షించే లోషన్లను ముఖానికి రాసుకోవాలి. లేకపోతే వేసవి వేడి వల్ల చర్మం దెబ్బతింటుంది. ఒక్కోసారి చర్మక్యాన్సర్లు వచ్చే ప్రమాదం కూడా లేకపోలేదు.

3. సన్‌ బ్లాక్‌ క్రీమ్‌ : ఒక్కోసారి మిట్టమధ్యాహ్నం బయటికి వెళ్లాల్సి వచ్చినప్పుడు ఎస్‌పిఎఫ్‌ 60 సన్‌బ్లాక్‌ క్రీముల్ని వెంటబెట్టుకు వెళ్లాలి. ముఖ్యంగా సమ్మర్‌లో ఎక్కువగా స్విమ్మింగ్‌ చేసేవాళ్లకు ఇది తప్పనిసరి.

4. మైల్డ్‌ షాంపూ : వేసవిలో స్ట్రాంగ్ షాంపూలను వాడొద్దు. అందులోని రసాయనాలకు వేసవి వేడి కూడా తోడవ్వడం వల్ల జుట్టుకు హాని కలుగుతుంది. అందుకని ఈ సీజన్‌లో మైల్డ్‌ షాంపూలను ఉపయోగిస్తేనే మంచిది.