తేనె-పాలు కాంబోతే సింప్లీ బ్యూటీ...

Posted: 11/18/2014 06:29 PM IST

తేనె-పాలు కలిపిన మిశ్రమంతో సహజత్వంతో కూడిన సౌందర్యాన్ని మరింతగా మెరుగుపరుచుకోవడంతో ఎన్నో ఆరోగ్యప్రయోజనాలను కూడా సొంతం చేసుకోవచ్చు. ఈ రెండింటి కాంబినేషన్ చర్మాన్ని కాంతివంతంగా మార్చి, చాలా సాఫ్ట్ గా, మృదువుగా వుంచుతుంది. అలాగే చర్మానికి సంబంధించిన వ్యాధుల నుంచి దూరంగా వుంచుతుంది. అయితే ఈ మిశ్రమాన్ని చల్లగా తీసుకోవడం కంటే గోరువెచ్చగా తయారుచేసుకున్న మిశ్రమాన్ని తీసుకుంటే ఇంకా ఎన్నో ప్రయోజనాలను పొందవచ్చు. గోరువెచ్చని పాలు-తేనె  మిశ్రమాన్ని ఉదయాన్నే తీసుకుంటే.. అది జీర్ణక్రియ రేటును పెంచుతుంది. అలాగే వృధ్యాప్యాన్ని నివారించడంతోపాటు మొటిమలను మటుమాయం చేస్తుంది. ఈ తేనె-పాలు మిశ్రమంతో ఇంకా కలిగే ఆరోగ్య - సౌందర్య ప్రయోజనాలేంటో తెలుసుకుందాం...

1. చర్మకాంతిని మెరుగుపరచడం : తేనె-పాలు మిశ్రమంలో యాంటి ఆక్సిడెంట్స్ పుష్కలంగా వుంటాయి. ఈ మిశ్రమాన్ని ఒక మాస్క్ లా వేసుకుంటే.. చర్మంపై వున్న హానికారక బ్యాక్టీరియాలను అంతమొందించి, తక్షణమే ప్రకాశవంతంగా మార్చేస్తుంది. నల్లగా వున్న ప్రాంతాలను తెల్లగా మార్చడంలోనూ ఈ పేస్ట్ అద్భుతంగా పనిచేస్తుంది.

2. మొటిమల నివారణ : ప్రతిరోజూ నిద్రపోవడానికి గంటముందు తేనె-పాల మిశ్రమాన్ని ముఖానికి ఒక మాస్క్ లా వేసుకోవాలి. గంట తరువాత గోరువెచ్చని నీటితో శుభ్రపరుచుకోవాలి. ఇలా చేస్తే ఇందులో వుండే పోషక విలువలు చర్మాన్ని మృదువుగా, సాఫ్ట్ గా మార్చేసి.. మొటిమలను పూర్తిగా నివారిస్తాయి. అలాగే ముఖంమీద పడ్డ నల్ల ఛారలు, మచ్చలు కూడా తొలగిపోతాయి.

3. పెదాల పగుళ్ళను అరికడుతాయి : అప్పుడప్పుడు ప్రతిఒక్కరికి పెదాల పగుళ్ల సమస్య రావడం సహజం. అటువంటి సమయాల్లో ఇతర కృత్రిమ క్రీములు వాడకుండా తేనె-పాలు మిశ్రమాన్ని పెదాలకు రాసుకుంటే... చాలా త్వరగానే మంచి ఫలితం దక్కుతుంది. పెదాలకు సహజత్వాన్ని అందించడంతోపాటు పగుళ్లను త్వరగా నివారిస్తాయి.

4. వృద్ధ్యాప్య నివారణ : ఈ రెండింటిని సరిసమానంగా ఒక కప్పులో తీసుకుని, బాగా కలుపుకోవాలి. ఆ మిశ్రమాన్ని ముఖానికి అప్లై చేసుకోవాలి. 20 నిముషాల అనంతరం చల్లని నీటితో శుభ్రపరుచుకోవాలి. ఇలా ప్రతిరోజూ చేస్తే.. ముడతలు, మచ్చలు, టానింగ్ తోపాటు వృద్ధాప్య సమస్య తక్షణమే తగ్గిపోతుంది.

5. మంచి నిద్ర : ప్రస్తుత బిజీ ప్రపంచంలో ఉదయంనుంచి సాయంత్రం వరకు ఆఫీసుతోబాటు ఇంటి కార్యకలాపా పనులను ఎక్కువ నిర్వహించుకోవాల్సి వస్తుంది కాబట్టి.. ఎక్కువగా అలసిపోతారు. అప్పుడు నిద్ర కూడా సరిగ్గా రాదు. ఆ సమయంలో ఈ మిశ్రమాన్ని బాగా మిక్స్ చేసి తాగితే.. ఎంతో హాయిగా నిద్రపోవచ్చు. ఇది శరీరంలో చల్లదనాన్ని ఏర్పరిచి, జీర్ణక్రియను వేగవంతం చేస్తుంది.