నిత్యజీవితంలో ప్రతిఒక్కరూ అందంగా వుండాలనే కోరుకుంటారు. వయసు మీదపడుతున్నప్పటికీ... యవ్వనంగా, ఆరోగ్యంగా వుండాలని ఆశిస్తారు. తమ చర్మసౌందర్యం పొడిబారకుండా వుండేందుకు తగిన జాగ్రత్తలు తీసుకుంటారు. ఇలా వుండడంతో వారు సంతోషంగా, ఆహ్లాదకరంగా తమ జీవితాన్ని సాగిస్తుంటారు. 

నిత్యం అందంగా కనిపించాలంటే... ముందుగా మన ఆహార అలవాట్లలో ఒక క్రమబద్దీకరణ వుండటం ముఖ్యం. ఈ పద్ధతిని పాటిస్తే.. మన శరీరాకృతిలో ఎటువంటి మార్పులు సంభవించక - ఆరోగ్యంగాను, అందంగాను కనిపిస్తారు. అదేవిధంగా అనవసరమైన భావోద్వేగాలకు లోనుకాకుండా, కాలుష్యాల నుండి దూరంగా వుండడంతోను అందంగా కనిపించవచ్చు. 

ముఖ్యంగా మన శరీరాకృతిలో ఎటువంటి మార్పులు కనిపించకుండా వుండాలంటే.. దానికి సంబంధించిన పోషక పదార్థాలు, విటమిన్లు, రసాయన పదార్థాలు సముపాళ్లలో తీసుకోవాలి. తీసుకునే ఆహారంలో కొవ్వు పదార్థాలు తక్కువగా వుండేటట్లు చూసుకోవాలి. ఇలా చేయడంతో శరీరంలో వుండే అవయవాలు శక్తివంతంగా పనిచేయడమే కాకుండా... వ్యాధినిరోధక శక్తిని పెంచి, జీర్ణక్రియ చక్కగా పనిచేయడానికి సహాయపడతాయి. 

ప్రతిరోజు లేవగానే కనీసం 1 నుంచి 2 గంటల వరకు వ్యాయమం చేయడం వల్ల శరీరానికి శాంతి లభిస్తుంది. రోజుకు 3 నుంచి 4 కిలోమీటర్ల దూరం పెరుగెత్తడంతో శరీరంలో వుండే కొవ్వు పదార్థాలు చెమట రూపంలో బయటకు వచ్చేస్తుంది. దీంతో మన శరీరాకృతిలో ఎటువంటి మార్పులు రావు. పైగా ఆరోగ్యవంతంగా కూడా వుండొచ్చు. కాబట్టి రోజు వ్యాయామం తప్పనిసరి. 

అనవసరమైన ఖర్చులు వెచ్చించి, రకరకాలైన లోషన్లు, క్రీములు, పౌడర్లు కొనుక్కోవడం కంటే... ఒక క్రమపద్ధతిలో ఆహారాన్ని తీసుకుంటే నిత్యం ఆరోగ్యంగా వుండొచ్చు. 

నిత్యం యవ్వనంగా, ఆరోగ్యంగా వుండేందుకు చిట్కాలు.....

మనం తీసుకునే ఆహారంలో కూరగాయలు ప్రధానపాత్రను పోషిస్తాయి. ఇందులో వుండే విటమిన్లు, పోషక పదార్థాలు మన శరీరంలో వుండే రోగాలను బయటకు పంపించడమే కాకుండా.. నిత్యం ఆరోగ్యంగా యవ్వనంగా వుంచేందుకు తోడ్పడుతాయి. 

అందులో ముఖ్యంగా క్యాబేజీ, బ్రొకొలీ, ముల్లంగి, ఉసిరి, క్యారెట్ వంటి కూరగాయల్లో విటమిన్ ఏ, విటమిన్ సీ లు సమృద్ధిగా వుంటాయి. ఇవి కంటికి సంబంధించిన వ్యాధుల నుంచి నిత్యం రక్షిస్తుంటాయి. అలాగే ఆకుకూరలలో వుండే ఐరన్ శరీరంలో వచ్చే అనేమియా వ్యాధికి గురికాకుండా సహాయపడుతుంది. ఈ విధంగా సమృద్ధిగా పోషక పదార్థాలు లభించే కూరగాయలు తీసుకోవడంతో గుండెజబ్బులు, మానసిక ఒత్తిడి వంటి జబ్బుల నుండి రక్షిస్తాయి. ఇక పళ్లవిషయానికొస్తే.. బొప్పాయి, అరటిపండు, సపోటాలో వుండే పొటాషియం, విటమిన్ ఇలు చర్మాన్ని ప్రకాశవంతం చేసి, నిత్యం యవ్వనం వుండేలాగా పనిచేస్తాయి. 

సోయాబీన్స్.... ఇది శరీరంలో వుండే హార్మోనుల సంఖ్య తగ్గకుండా అరికడుతుంది. ఇందులో వుండే సైటిక్ యాసిడ్స్ చర్మాన్ని పొడిబారకుండా, వయసు పైబడనీయకుండా చూసుకుంటుంది. అదేవిధంగా బ్రెస్ట్, పేగు, ఉదర క్యాన్సర్ల జబ్బులబారిన పడకుండా కాపాడుతుంది. మెనోపాజ్ దశను నిరోధిస్తుంది. 

బెర్రీస్..... స్ట్రాబెర్రీస్, నల్లద్రాక్ష, బ్లూబెర్రీస్, నేరేడు పండ్లు మొదలైన వాటిలో వుండే సైటో కెమికల్స్... క్యాన్సర్ నిరోధకశక్తిని కలిగివుంటాయి. నేరేడు పండ్లలో వుండే విటమిన్ ఏ, సిలు చక్కెరవ్యాధిని నిరోధించడంలో ముఖ్యపాత్రను పోషిస్తాయి. అంతేకాదు.. ఇవి కొవ్వును అరిగించే గుణాలను కూడా కలిగి వుంటాయి. 

టమోటా..... ఇది శరీరంలో వుండే రోగనిరోధక శక్తిని పెంచే ఒక యంత్రం. గుండెకు సంబంధించిన వ్యాధులు, క్యాన్సర్ కు సంబంధించిన వ్యాధులను అరికడుతుంది. ఇందులో వుండే విటమిన్ ఏ, ఇలు కళ్లు, చర్మానికి ఎంతో మంచివి. 

పుచ్చకాయ..... ఇందులో విటమిన్లు (ఏ, బీ, సీ) పుష్కలంగా వుండటం వల్ల చర్మం పొడిబారకుండా పునరుజ్జీవనం చేస్తాయి. వీటి గింజల్లో కూడా సోడియం, జింక్ వంటి రసాయనాలు యవ్వనంగా కనిపించేలా చేస్తాయి. 

కోకోవా..... ఇందులో వుండే ఫ్లేవినాయిడ్స్ పోషకాలు.. శరీరంలో ఆరోగ్యవంతమైన రక్తప్రసరణకు సహకరిస్తాయి. బ్లడ్ ప్రెజర్ లోపాలను అరికట్టేస్తాయి. ఇతర చాక్లెట్లలో వుండే ఫాట్ పదార్థాలు ఇందులో వుండవు కాబట్టి ఇవి అందాన్ని పెంచడంలో చాలావరకు సహాయపడుతాయి. 

ఎండుఫలాలు..... బాదం, పిస్తా, జీడిపప్పు మొదలైనవి ఎండుఫలాలు. ఇందులో చాలావరకు విటమిన్ ఇ, ఐరన్, పొటాషియమ్, జింక్, ఒమెగా-3 ఫాటీ ఆసిడ్స్ వుంటాయి. ఇవన్నీ శరీర అందాన్ని పెంచడంలో తమదైన పాత్రను పోషిస్తాయి. ఈ ఎండుఫలాలలో వుండే నూనె.. ముఖాన్ని కాంతివంతంగా ప్రకాశించేలా చేస్తాయి. 

నీళ్లు - పళ్లరసాలు..... సాధారణంగా నీరు శరీరానికి ఒక ఔషదం వంటిది. నీటిని ప్రతిరోజు ఎంత ఎక్కువ తాగితే అంత మంచిది. అలాగే దోసకాయ, ఆరెంజ్, బత్తాయి, నిమ్మరసాలతోబాటు కొబ్బరి నీళ్లలో కూడా శరీర అందాన్ని పెంచే గుణాలు కలిగి వుంటాయి. 

పెరుగు - తేనె..... పెరుగు శరీరంలో వుండే జీర్ణక్రియకు ఎంతో సహాయపడుతుంది. కొవ్వుపదార్థాలను కరిగించేందుకు ముఖ్యపాత్ర పోషిస్తుంది. అదేవిధంగా తేనె శరీరంలో వుండే వత్తిడిని తగ్గించి, మతిమరుపును అరికడుతుంది. 

ఈ విధంగా ఆహార పదార్థాలను నిత్యం తీసుకోవడంతో చిరకాలం యవ్వనంగా కనిపించడంతోబాటు ఆరోగ్యంగా, సుఖంగా జీవితాన్ని ముందుకు సాగించవచ్చు.