గుజరాత్ కు మోదీ చేసిందేంటి? : రాహుల్ గాంధీ

Posted: 11/29/2017 06:13 PM IST

గుజ‌రాత్ అసెంబ్లీ ఎన్నిక‌ల ప్రచారంలో భాగంగా ఏఐసీసీ ఉపాధ్యక్షుడు రాహుల్ గాంధీ ప్ర‌ధాన‌మంత్రి నరేంద్ర మోదీపై విభిన్న రీతిలో విరుచుకుపడుతున్న విషయం తెలిసిందే. తన ప్రసంగాలతో మోదీకి చుర‌క‌లు అంటిస్తూ గుజరాతీలను ఆకట్టుకునే యత్నం చేస్తున్నాడు. ఈ క్రమంలో గతంలో గుజరాత్ అభివృద్ధిని ప్రస్తావిస్తున్నారు.

గుజ‌రాత్‌లో 2012 అసెంబ్లీ ఎన్నికల స‌మ‌యంలో ముఖ్యమంత్రి హోదాలో ఉన్న‌ నరేంద్ర మోదీ ఇచ్చిన హామీని రాహుల్‌ గాంధీ త‌న ట్విట్ట‌ర్ ఖాతా ద్వారా ఈ సంద‌ర్భంగా గుర్తు చేశారు. వచ్చే ఐదేళ్లలో గుజరాత్‌లో 50 లక్షల పక్కా ఇళ్లు కట్టిస్తామని ఆ ఎన్నిక‌లప్పుడు మోదీ హామీ ఇచ్చార‌ని, మేనిఫెస్టోలో కూడా ఈ హామీని పెట్టారని తెలిపారు. గత ఐదేళ్లలో ఆ రాష్ట్ర స‌ర్కారు 4.72 లక్షల ఇళ్లు మాత్రమే నిర్మించిందని, ఈ లెక్క ప్ర‌కారం బీజేపీ హామీని నిలబెట్టుకోవాలంటే మరో 45 ఏళ్లు పడుతుందని చుర‌క‌లంటించారు.

అచ్చె దిన్ రావాలంటే బీజేపీ పాలన పోవాల్సిందేనని.. కాంగ్రెస్ అధికారంలోకి వస్తే అన్ని వర్గాల అభివృద్ది కోసం పాటుపడతామని హామీ ఇస్తున్నానని రాహుల్ పేర్కొన్నాడు.