బాబు దోపిడీ.. చర్చకు మేం రెడీ: కాంగ్రెస్

Posted: 06/16/2017 04:48 PM IST

తెలుగుదేశం పార్టీ అధినేత చంద్రబాబు నాయుడుపై ఏపీ కాంగ్రెస్ చీఫ్ రఘువీరారెడ్డి తీవ్ర స్థాయిలో విరుచుకుపడ్డాడు. ‘దోపిడి బాబు’ పేరిట రూపొందించిన ఓ పుస్తకాన్ని ఆవిష్కరించిన అనంతరం బాబుపై విమర్శలు చేశాడు. అంతేకాదు టీడీపీ, బీజేపీ మూడేళ్ళ పాలనపై కాంగ్రెస్ పార్టీ చార్జిషీట్ ను ఆయన విడుదల చేశారు. బాబు మూడేళ్ల పాలనలో అవినీతిమయమని, ఓ ముఖ్యమంత్రే అవినీతికి పాల్పడటం రాష్ట్రానికి శాపంగా మారిందని ఆరోపించారు. సీఎం సహా ఆ పార్టీలో ఉన్న వారందరూ ఆర్థిక నేరస్థులేనని తీవ్ర ఆరోపణలు చేశారు.

‘దోపిడి బాబు’ పేరిట విడుదల చేసిన ఈ పుస్తకం ద్వారా ప్రజలకు అన్ని విషయాలు వివరించడానికి తాము సిద్ధమేనని, దీనిపై బహిరంగ చర్చకు రావాలని రఘువీరా సవాల్ విసిరారు.రాష్ట్రంలో రూ.34 వేల కోట్లతో పూర్తి చేయాల్సిన ప్రాజెక్టులను రూ.76 వేల కోట్లకు పెంచి కేబినెట్ నిర్ణయంతో చంద్రబాబు అవినీతికి పాల్పడ్డారని, టీడీపీ మంత్రులే భూదందాలకు పాల్పడి రోడ్లపైనే కొట్టుకుంటున్నారని ఆరోపించారు.

ఎన్నికలకు ముందు పలు కులాలకు ఇచ్చిన హామీల్లో ఏ ఒక్కటీ అమలు చేయలేదని అబద్ధాల కోరు ట్యాగ్ లైన్ తగిలించుకున్నాడని, టీడీపీ భూ కుంభకోణంలో ఆరోపణలు ఎదుర్కొంటున్న ఎమ్మెల్సీ దీపక్ రెడ్డిని పార్టీ నుండి సస్పెండ్ చేయడం ఎవరిని మభ్యపెట్టేందుకని రఘువీరా ప్రశ్నించాడు.