అందుకే జగన్ దీక్ష చేస్తున్నారు : పురందేశ్వరి

Posted: 10/08/2015 03:28 PM IST

Daggubati purandeshwari comments ys jagan hunger strike in guntur district

ప్రత్యేక హోదా కోసం వైకాపాధినేత వైఎస్ జగన్ మోహన్ రెడ్డి గుంటూరులో దీక్ష చేపట్టిన విషయం తెలిసిందే! ప్రత్యేక హోదా ఏపీ హక్కు అంటూ ఆయన చేపట్టిన ఈ దీక్షపై విపక్ష పార్టీలు విమర్శలు గుప్పిస్తున్నాయి. ముఖ్యంగా టీడీపీ, బీజేపీ కూటమి నాయకులు తమదైన శైలిలో జగన్ దీక్షపై సెటైర్లు, కామెంట్లు చేస్తున్నారు. ఇప్పుడు తాజాగా బీజేపీ నాయకురాలు దగ్గుబాటి పురందేశ్వరి మండిపడ్డారు. రాష్ట్ర ప్రజలను తప్పుదారి పట్టించేందుకే జగన్ ఈ దీక్ష చేపట్టారని ఆమె ఆగ్రహం వ్యక్తం చేశారు.

గుంటూరు జిల్లా చిలకలూరిపేటలో నిర్వహించిన బీజేపీ కార్యకర్తల శిక్షణ శిబిరంలో పాల్గొన్న పురందేశ్వరి.. ఈ సందర్భంగా జగన్ దీక్షపై విమర్శలు చేశారు. పార్లమెంటరీ బిల్లులో ప్రత్యేక హోదా అనే పదం లేకపోయినప్పటికీ ఏపీని కేంద్రం తప్పుకుండా ఆదుకుంటుందని హామీ ఇచ్చిందని.. అలాంటప్పుడు ‘హోదా’ కోసం అనవసరంగా రాద్ధాంతం చేయడం ఎందుకని అన్నారు. రాష్ట్ర ప్రజలను తప్పుదారి పట్టించేందుకు జగన్ దీక్ష చేపట్టి నానా రాద్ధాంతం సృష్టిస్తున్నారని, ఆయన దీక్ష చేయడం వల్ల ఎటువంటి లాభం లేదని ఈమె తేల్చి చెప్పేశారు.

ఈ నేపథ్యంలోనే పోలవరం ప్రాజెక్టు గురించి మాట్లాడుతూ.. రాష్ట్ర ప్రభుత్వం ఆలస్యం చేయడం వల్లే ఆ ప్రాజెక్టు నిర్మాణంలో జాప్యం జరుగుతోందని వ్యాఖ్యానించారు. సమయానికి నివేదిక పంపించకపోవడం వల్లే నిధుల విడుదలలో ఆలస్యమైందని తెలిపారు.