సీఎం అయ్యారు.. వాళ్లని పీకేస్తున్నారు : జగన్

Posted: 09/22/2015 01:07 PM IST

Ys jagan mohan reddy controversial comments chandrababu vizag yuvabheri conference

ఏపీకి ‘ప్రత్యేక హోదా’ కోసం వైకాపాధినేత వైఎస్ జగన్మోహన్ రెడ్డి విశాఖపట్టణంలో ‘యువభేరి’ సమరశంఖం పూరించారు. విశాక కళావాణి పోర్టు స్టేడియంలో జరిగిన ఈ సదస్సులో ఆయన ఏపీ సీఎం చంద్రబాబు, ప్రభుత్వ విధానాలపై తీవ్ర విమర్శలు చేశారు. హోదాపై బాబు మభ్యపెట్టే ప్రయత్నం చేస్తున్నారన్నారు. మంత్రుల్లో కొంతమందికి అసలు ‘ప్రత్యేక హోదా’ అంటే ఎంటో కూడా తెలియదని ఆయన ఎద్దేవా చేశారు. రాష్ట్రానికి పదేళ్లు ‘ప్రత్యేక హోదా’ ఇస్తామని ఎన్నికల నేపథ్యంలో బీజేపీ చెప్పిందని... కానీ ఇప్పుడు ఆ ఊసే ఎత్తడంలేదని పేర్కొన్నారు.

ఇక ఎన్నికల నేపథ్యంలో బాబు చేసిన ‘ఉద్యోగ హామీ’ని గుర్తూ చేస్తూ.. సంచలన వ్యాఖ్యలు చేశారు. ఎన్నికల ముందు తాను సీఎం అయితే ఉద్యోగం వస్తుందని చంద్రబాబు ప్రచారం చేసుకున్నారని, అలాగే నిరుద్యోగ భృతి కూడా ఇస్తామని హామీ ఇచ్చారని.. కానీ ఆయన సీఎం అయ్యాక ఉన్న ఉద్యోగాలనే పీకేస్తున్నారుని విమర్శించారు. ఒక్క విశాఖలోనే 5వేల కాంట్రాక్ట్ ఉద్యోగాలు పోయాయని జగన్ చెప్పారు. అంతేగాక ఇప్పటివరకు ఒక్క కొత్త ఉద్యోగం ఇవ్వలేదన్నారు. ఇక డీఎస్సీ పరీక్ష రాసిన వారికీ ఉద్యోగం వస్తుందన్న నమ్మకం కూడా లేదన్నారు. రాష్ట్రంలో ప్రస్తుతం 1.42 లక్షల పోస్టులు ఖాళీగా ఉన్నాయని, వాటికి నోటిఫికేషన్ విడుదలచేసి ఖాళీలను భర్తీ చేయడంలేదని ఆగ్రహం వ్యక్తం చేశారు. అటు యూనివర్శిటీల్లో 5వేల ఉద్యోగాలు ఖాళీగా ఉన్నాయన్నారు.

వర్సిటీలు దివాళా తీయాలన్న ఆలోచనలో బాబు ప్రభుత్వం ఉందని ఆరోపించారు. ప్రైవేటు యూనివర్శిటీలను తీసుకురావాలన్నదే చంద్రబాబు ఆలోచన అని జగన్ చెప్పుకొచ్చారు. దాంతో ఇక విద్యార్థులకు కన్వీనర్ కోటా ఉండదని, ఫీజు రీయింబర్స్ మెంట్ పథకాన్ని తీసేయాలన్న ఆలోచనలో ప్రభుత్వం ఉందని వ్యాఖ్యానించారు. ఈ క్రమంలోనే రైతుల రుణమాఫీపై జగన్ మాట్లాడుతూ.. రాష్ట్రంలో రైతు రుణాలు ఏ ఒక్కరికీ మాఫీ కాలేదని, బాబు ఇచ్చిన డబ్బులు వడ్డీలకే సరిపోవడం లేదని మండిపడ్డారు.