ఆంధ్రా నాయకులు నిర్లక్ష్యం చేశారు : హరీశ్ రావు

Posted: 09/14/2015 03:14 PM IST

ఆంధ్రా నాయకుల మీద లావాలాగా అంతెత్తున ఎగిసిపడే తెలంగాణ మంత్రి హరీష్ రావు మరోసారి తన ప్రతాపాన్ని ప్రదర్శించారు. ఆంధ్రాపాలకుల కారణంగా తెలంగాణ రాష్ట్రంలో ఎంతో నష్టం వాటిల్లిందని, రాష్ట్రాన్ని అభివృద్ధి చేయకుండా తమ సొంత స్వలాభాల కోసం డబ్బులు దోచేసుకున్నారంటూ గతంలో చాలా సందర్భాల్లో హరీశ్ సంచలన వ్యాఖ్యలు చేసిన విషయం తెలిసిందే! ఇప్పుడు ఆ తరహాలోనే మరోసారి ఆయన తీవ్ర విమర్శలు చేశారు.

సోమవారం పాలకుర్తి రైతులు తమ సమస్యలు పరిష్కరించాలంటూ బంజారాహిల్స్ లోని మంత్రుల నివాస ప్రాంగణంలో హరీశ్ రావును కలిశారు. ఈ మేరకు ఒక వినతి పత్రాన్ని వారు సమర్పించగా.. అందుకు సానుకూలంగా హరీశ్ స్పందించారు. ఈ నేపథ్యంలోనే ఆయన మాట్లాడుతూ.. పాలకుర్తి నియోజకవర్గంలోని 8 గ్రామాలకు నీరందిస్తామన్నారు. వచ్చే రెండేళ్లలో శ్రీ రాంసాగర్ ప్రాజెక్టు (ఎస్పారెస్పీ) ఫేజ్-2లో నీరు వచ్చేలా చూస్తామని మంత్రి చెప్పారు. గత ప్రభుత్వాల ఆంధ్రా పాలకులు దేవాదుల ఫేజ్ 1, 2ను నిర్లక్ష్యం చేశారని, వారివల్లే ఇప్పుడు నీటి సమస్య తలెత్తిందని ఆయన ఆరోపించారు.