విభేదాలున్నా.. ప్రభుత్వాలుగా ముందుకెళ్దాం : బాబు పిలుపు

Posted: 05/19/2015 11:59 AM IST

రాష్ట్ర విభజన నేపథ్యంలో టీఆర్ఎస్, టీడీపీ పార్టీ మధ్య తీవ్రస్థాయిలో విభేదాలు చోటు చేసుకున్న విషయం తెలిసిందే! ఒకరిపై మరొకరు ఆరోపణలు, విమర్శలు చేసుకోవడం, సంచలనాలకు తెరలేపడం వంటి ఘటనలు ఇప్పటివరకు ఎన్నో జరిగాయి.. జరుగుతూనే వున్నాయి. ముఖ్యంగా ఈ రెండు ప్రభుత్వాల మధ్య విభేదాలు విద్యుత్ పంపిణీ, విద్యుదుత్పత్తి, నీటి వాటాలు, ఉన్నత విద్యామండలి బ్యాంకు ఖాతాల విషయాల్లో మరింత తారాస్థాయికి చేరాయి. ఈ వ్యవహారాల్లో రెండు ప్రభుత్వాలు దుమ్మెత్తిపోసుకున్నాయే తప్ప.. పరిష్కార మార్గాలను మాత్రం అన్వేషించలేకపోయాయి.

అయితే.. ఇప్పుడు ఏపీ సీఎం చంద్రబాబు నాయుడు తమ మధ్య వున్న విభేధాలకు ఫుల్ స్టాప్ పెట్టేందుకు పరిష్కార మార్గాలను అన్వేషిద్దాం రండి అని తెలంగాణ ప్రభుత్వానికి పిలుపునిచ్చారు. ఈ మేరకు ఆయన ఢిల్లీ పర్యటనలో వున్న సందర్భంగా ప్రకటన చేశారు. రాజకీయంగా విభేదించినా.. ప్రభుత్వాలుగా ముందుకెళదామంటూ ఆయన ప్రతిపాదన చేశారు. రాష్ట్ర విభజన జరిగిన ఏడాది పూర్తి కావస్తున్నప్పటికీ.. 9,10వ షెడ్యూల్ కేటగిరీ సంస్థల విభజన ఇంకా పూర్తి కాలేదని, ఈ సంస్థల విభజన కలిసి కూర్చుని చర్చించుకుందామని ఆయన టీఎస్ ప్రభుత్వానికి పిలుపునిచ్చారు.

అంతేకాదు.. ఒకవేళ ఇరువురి మధ్య విభేదాలు వస్తే, ఇద్దరికీ నచ్చిన పెద్ద మనిషిని మధ్యవర్తిగా పెట్టుకుందామని బాబు పేర్కొన్నారు. అప్పటికీ సమస్య పరిష్కారం కాకపోతే.. కేంద్ర ప్రభుత్వం సహాయం తీసుకుందామని చెప్పారు. మరి.. చంద్రబాబు తెచ్చిన ఈ కొత్త ప్రతిపాదనపై సీఎం కేసీఆర్ ఏ విధంగా స్పందిస్తారో వేచి చూడాల్సిందే!