బౌన్సర్ గా పనిచేసినోడు విమర్శలు చేస్తున్నాడు..

Posted: 05/09/2015 12:32 PM IST

తెలుగురాష్ట్రాల పొలిటికల్ రంగంలో వివాదాస్పద వ్యాఖ్యలతో సంచలనాలు సృష్టించే టీ.టీడీపీ నేత రేవంత్ రెడ్డి.. తాజాగా తెలంగాణ మంత్రి తలసాని శ్రీనివాస్ యాదవ్ పై తీవ్రస్థాయిలో విరుచుకుపడ్డారు. టీడీపీ పార్టీలోనే రాజకీయ పాఠాలు నేర్చుకున్న తలసాని.. టీఆర్ఎస్ పార్టీలో చేరినప్పటి నుంచి తన తల్లిపార్టీ మీద తీవ్ర విమర్శలు చేస్తున్న విషయం తెలిసిందే! టీడీపీ మంత్రులకు సవాల్ విసరడం, రకరకాల ఆరోపణలు చేయడం లాంటివి చేస్తున్నారు. దీంతో చిర్రెత్తుకొచ్చిన రేవంత్.. ఇప్పుడు ఆయన మీద తన మాటలమంత్రాన్ని ప్రదర్శించారు.

సికింద్రాబాదులో జరిగిన టీడీపీ మినీ మహానాడులో రేవంత్ రెడ్డి మాట్లాడుతూ.. తలసాని స్థాయికి మించిన విమర్శలు చేసి పార్టీలో పలుకుబడి పెంచుకుందామని ప్రయత్నిస్తున్నాడని అన్నారు. టీడీపీలోకి రాకముందు తలసాని సినీ నటుడు మోహన్ బాబు షూటింగుల దగ్గర బౌన్సర్ గా పనిచేసేవాడని తెలిపారు. అలాంటి తలసాని ఇప్పుడు చంద్రబాబు, పవన్ కల్యాణ్ తనతో పోటీ చేయాలని సవాళ్లు విసురుతున్నాడని ఎద్దేవా చేశారు. చేతనైతే గెలిపించిన పార్టీకి రాజీనామా చేసి.. ఆ తర్వాత తాను ఎంత గొప్ప నేతో నిరూపించుకోవాలని రేవంత్ సవాలు విసిరారు.

ప్రస్తుతం తలసాని అనుభవిస్తున్న హోదా వెనుక టీడీపీ పెట్టుబడి, రక్తం, శ్రమ వుందని.. అతనికి సిగ్గూశరం వుంటే తక్షణం టీడీపీకి రాజీనామా చేయాలని ఆయన డిమాండ్ చేశారు. రేవంత్ ఈ విధంగా చేసిన సంచలన కామెంట్లపై తలసాని ఏ విధంగా స్పందిస్తారో వేచి చూడాల్సిందే!

AS