దేశాన్ని దిగజారుస్తున్న మోదీ : సోనియా ఆన్ ది ఫైర్

Posted: 05/06/2015 04:17 PM IST

Sonia gandhi fires narnedra modi government right to information act

రాహుల్ గాంధీ మాయమైన తర్వాత కాంగ్రెస్ పార్టీ నేతలతోపాటు ఆ పార్టీ అధ్యక్షురాలు కొన్నాళ్లు సైలెంట్ గా కాలం గడిపారు. అయితే.. రాహుల్ తిరిగొచ్చి తన ప్రతాపాన్ని బీజేపీ మీద ప్రదర్శించడంతో ఆ పార్టీ మళ్లీ పుంజుకున్నట్లు కనిపిస్తోంది. నిన్నటివరకు నోరుమెదపకుండా వున్న ఆ పార్టీ ఇప్పుడు వీలుచిక్కినప్పుడల్లా బీజేపీ మీద తన ‘హస్తం’ పంజా విసురుతోంది. ఈ క్రమంలోనే తాజాగా సోనియా గాంధీ బీజేపీ మీద, ప్రధాని నరేంద్రమోడీ మీద తీవ్రస్థాయిలో మండిపడ్డారు.

బుధవారం ఉదయం పార్లమెంట్ లో ప్రసంగించిన సోనియా.. ఈ నేపథ్యంలో మోడీ మీద ఆగ్రహం వ్యక్తం చేశారు. మోదీ సర్కార్ అన్ని విషయాల్లోనూ కార్పొరేట్లకు మేలు కలిగించే నిర్ణయాలు తీసుకుంటూ.. ఓ పద్ధతి ప్రకారం దేశాన్ని దిగజారుస్తోందని ఆమె విమర్శించారు. సంస్థాగత యంత్రాంగం పూర్తిగా వైఫల్యం చెందిందని ఆరోపించారు. ప్రజల చేతుల్లో బలమైన ఆయుధంగా వున్న సమాచార హక్కు చట్టాన్ని బలహీనపరుస్తున్నారని దుయ్యబట్టారు. ఈ చట్టం కింద 39 వేల దరఖాస్తులు పెండింగులో వున్నాయని, వాటికి సమాధానాలు ఎప్పుడిస్తారో తెలిపాలని ఆమె డిమాండ్ చేశారు.

సుపరిపాలనను, పారదర్శకతను తీసుకువస్తానని హామీలిచ్చిన మోదీ.. ఆ రెండింటికీ ఆమడ దూరం జరిగిపోయారని సోనియా విమర్శించారు. చీఫ్ ఇన్ఫర్మేషన్ ఆఫీసర్ పోస్టు గత 8 నెలలుగా ఖాళీగా వుందని.. లోక్ పాల్ కు సీవీసీ నియామకమూ జరగలేదని ఆమె గుర్తు చేసింది. ఖాళీగా వున్న కీలక పోస్టులను తక్షణం భర్తీ చేయాలని ఆమె మోదీ సర్కార్ ని డిమాండ్ చేసింది.