బీజేపీలో వైకాపా విలీనం.. జోస్యం చెప్పిన ఆనం

Posted: 03/03/2015 02:52 PM IST

వైఎస్సార్ కాంగ్రెస్ పార్టీ అధ్యక్షుడు వైఎస్ జగన్ మోహన్ రెడ్డి మొన్నామధ్య కేంద్రహోంశాఖ మంత్రి రాజ్ నాథ్ సింగ్ తో కలిసి చర్చలు జరిపిన విషయం గుర్తుండే వుంటుంది. అలాగే బీజేపీ పార్టీ అధ్యక్షుడు అమిత్ షాతోనూ ఈయన కలిసినట్లుగా వార్తలు వస్తున్నాయి. ఇలా జగన్ బీజేపీ పార్టీ ముఖ్యనేతలతో కలవడాన్ని చూస్తుంటే.. త్వరలోనే తన వైకాపా పార్టీని బీజేపీలో విలీనం చేసే అవకాశాలు వున్నాయని వార్తలు వార్తలొచ్చాయి. అయితే.. అవన్నీ కేవలం రూమర్లేనంటూ ఆ పార్టీ నేతలు వాటిని కొట్టిపారేస్తున్నప్పటికీ.. విలీనం వార్తలు మాత్రం జోరుగానే సాగుతున్నాయి.

బీజేపీ-వైకాపా విలీనంపై వస్తున్న వార్తలేమోగానీ... ఇదే విషయమై కాంగ్రెస్ నేత ఆనం వివేకానందరెడ్డి మాత్రం తనదైన జోస్యం తెలిపారు. తనపై వున్న అక్రమాస్తుల కేసుల నుంచి తప్పించుకోవడం కోసం జగన్ కుట్ర పన్నుతున్నారని, బీజేపీలో తన పార్టీని విలీనం చేయాలని జగన్ భావిస్తున్నారని ఆనం విమర్శించారు. ఇప్పటికే అమిత్ షా, రాజ్ నాథ్ తో జగన్ సంప్రదింపులు పూర్తయ్యాయనని, ఇక మిగిలింది మోదీతో మాత్రమేనని ఆనం ఆరోపించారు. మోదీతో కలిసిన అనంతరం జగన్ తన వైకాపా పార్టీని ఖచ్చితంగా బీజేపీలో విలీనం చేస్తారని ఆనం జోస్యం పలికారు. ఇంతేకాదు.. జగన్ మీద ఆయన బాగానే విరుచుకుపడ్డారు.

లక్ష కోట్ల రూపాయలు తిన్న జగన్ ఒక ‘జగజ్జంత్రి’ అని ఆరోపించారు. జగన్ ను జైలు భయం ఇంకా వెంటాడుతూనే వుందని, అందుకే బడ్జెట్ లో రాష్ట్రానికి అన్యాయం జరిగినప్పటికీ.. ఆ విషయంపై అతను కేంద్రాన్ని ఎందుకు నిలదీయడం లేదని ప్రశ్నను లేవనెత్తారు. ఒకవేళ అలా కేంద్రాన్ని విమర్శిస్తే.. ఏ కేసు వచ్చి తన మీద పడుతుందోనని, మళ్లీ ఎక్కడా జైలులో కాలక్షేపం చేయాల్సి వస్తుందోనన్న భయంతో వణుకుతున్నారని అన్నారు. ఆయనపై విచారణలో వున్న 40 కేసుల్లో ఏదో ఒకదాంట్లో ఖచ్చితంగా శిక్ష అనుభవించక తప్పదని పేర్కొన్నారు.