అమ్మ విలీనం చేయమంటే చేస్తాను

Posted: 01/06/2014 05:56 PM IST

తెలంగాణ రాష్ట్రం ఇస్తే టీఆర్ఎస్ పార్టీని కాంగ్రెస్ లో విలీనం చేస్తానని కాంగ్రెస్ అధిష్టానానికి మాటిచ్చిన కేసీఆర్ తెలంగాణ ప్రకటన చేసి, దాని బిల్లు ప్రక్రియను పూర్తి చేసి అసెంబ్లీకి పంపిన కాంగ్రెస్ అధిష్టానం విలీనం మాటేంటి అని అడిగితే... కాంగ్రెస్ లో పార్టీనీ విలీనం చేసేది లేదు... కావాలంటే పొత్తు పెట్టుకుంటామని చెప్పిన ఆయన ఇప్పుడు కాస్తంత వెనక్కి తగ్గి కాంగ్రెస్ నాయకులు అన్నట్లుగానే... అమ్మ ఎలా చెబితే అలానే అంటున్నాడు.

తెలంగాణ విద్యార్థి విభాగం నేతలతో సమావేశం అయిన కేసీఆర్ వారితో అన్న మాటలు ఆశ్చర్యాన్ని కలిగిస్తున్నాయి. మొన్నటి వరకు ససేమిరా అన్న కేసీఆర్ ఏఐసీసీ అధ్యక్షురాలు మేడమ్ సోనియాగాంధీ ఏం చెబుతుందో చూద్దాం. తెలంగాణ రాష్ట్రం ఇచ్చినందుకు కృతజ్ఞత చూపించాలని అడిగితే.. చూపిద్దాం అని అన్నారు. మేడమ్ ఎలా అడిగితే అలా కృతజ్ఞత చూపిద్దామని కూడా అన్నారు.

కాంగ్రెస్ పార్టీ ఇంతవరకు మనతో ఏమీ మాట్లాడలేదు. తెలంగాణ రాష్ట్ర ఏర్పాటును ప్రకటించినందుకు.. ఢిల్లీకి వెళ్లి మేడమ్ సోనియాగాంధీని కలిసి కృతజ్ఞతలు చెప్పే కార్యక్రమం ఉంది. పార్టీపరంగా కలిసినప్పుడు ఆమె ఏం చెబుతారో చూడాలి. మనం దేనికైనా సిద్ధంగా ఉండాలని చూచించారని అంటున్నారు.

అంటే కాంగ్రెస్ పార్టీలో పార్టీని విలీనం చేయమని సోనియా చెబితే కేసీఆర్ సిద్దమేనా ? ఒకవేళ స్వతంత్రంగా నిర్ణయం తీసుకొని విలీనానికి మొగ్గు చూపితే పార్టీని నమ్ముకున్న టీఆర్ఎస్ నేతల పరిస్థితి ఏమిటనే సందేహాలు వ్యక్తం చేస్తున్నారు టీఆర్ఎస్ నాయకులు.