Posted: 08/27/2012 12:26 PM IST

టిటిడి చైర్మన్ పదవి విషయంలో మరోమారు భంగపాటుకు గురైన గుంటూరు ఎంపి రాయపాటి సాంబశివరావు తీవ్ర నిరాశ, నిస్పృహలకు లోనయ్యారు. ఎంపి రాయపాటి అనుచరులు గుంటూరులోని ఆయన నివాసానికి చేరుకొని కాంగ్రెస్ అధిష్టానం వైఖరిపై తీవ్ర ఆగ్రహావేశాలు వ్యక్తం చేశారు. రాష్ట్ర రాజకీయాల్లో సీనియర్ నేత అయిన ఎంపి రాయపాటికి ప్రతిమారు మొండిచేయి చూపుతున్నారని, ఇకపై ఎట్టి పరిస్థితుల్లో పార్టీలో కొనసాగాల్సిన అవసరం లేదంటూ వెంటనే రాజీనామా చేయాల్సిందిగా ఎంపి అనుచరులు ఆయనపై తీవ్రమైన ఒత్తిడి తెచ్చారు. సీనియర్ నేత అయిన మీకే ఇంతటి అన్యాయం జరుగుతుంటే మాకేం న్యాయం చేస్తారంటూ తెనాలి మాజీ జడ్పీటిసి శాఖమూరి నారాయణప్రసాద్ ఎంపిని ప్రశ్నించారు. అనుచరులు అడిగే ప్రశ్నలన్నింటికీ ఏం సమాధానం చెప్పాలో తెలియక ఎంపి నిర్వేదంగా కూర్చుండిపోయారు. కొద్దిసేపటి అనంతరం తేరుకున్న ఎంపి రాయపాటి తాను సోనియాగాంధీని కలసి ఇక్కడ జరుగుతున్న పరిణామాలన్నింటినీ ఆమెకు వివరిస్తానని, ఆ తర్వాత తుది నిర్ణయం తీసుకుంటానని తెలిపారు. టిటిడి చైర్మన్ పదవి రానందుకు తనకు ఎటువంటి అసంతృప్తి లేదని, కేడర్ మాత్రం ఆవేదనతో ఉన్నారని అన్నారు. గతంలో టిటిడి చైర్మన్ పదవి భర్తీచేసే సమయంలో వచ్చేమారు తనకు పదవి కేటాయిస్తానని హామీ ఇచ్చారని, తాజా పరిణామాలు తాను అవమానంగా భావిస్తున్నానని పేర్కొన్నారు. మొత్తమీద టిటిడి పదవి విషయంలో తాజాగా నెలకొన్న పరిణామాలు రాయపాటి శిబిరంలో తీవ్ర ఆగ్రహాన్ని రగిల్చాయి.