Posted: 06/29/2012 10:45 AM IST

మన సీఎం కిరణ్ గారు గతంలో కంటే ..ఉప ఎన్నికల తరువాత .. కొత్తగా కనిపిస్తున్నారట.  తన వద్ద ఉన్న పాత ఆటలను వదిలేసి ..కొత్త కొత్త ఆటలు .. మంత్రులతో కలిసి ఆడుతున్నారని  కాంగ్రెస్ నాయకులు అంటున్నారు. అంతే కాకుండా ఢిల్లీ నాయకులతో  కూడా  కిరణ్ సార్  మంతనాలు జరుపుతున్నట్లు తెలుస్తోంది. ముఖ్యమంత్రి నల్లారి కిరణ్‌కుమార్ రెడ్డి రాష్ట్ర కాంగ్రెస్ వ్యవహారాల ఇన్‌చార్జ్ గులాం నబీ ఆజాద్‌తో సమావేశమై రాష్ట్ర రాజకీయాల గురించి సుదీర్ఘ మంతనాలు జరిపారు. యుపిఏ రాష్టప్రతి అభ్యర్థి ప్రణబ్ ముఖర్జీ నామినేషన్ పత్రాల దాఖలు కార్యక్రమానికి హాజరైన కిరణ్‌కుమార్ రెడ్డి ఆ తరువాత పార్లమెంటు ఆవరణలో ఆజాద్ కార్యాలయానికి వెళ్లి ఆయనతో చర్చలు జరిపారు. ఉప ఎన్నికల ఫలితాల అనంతరం రాష్ట్రంలో నెలకొన్న రాజకీయ పరిస్థితులు, ప్రభుత్వ పనితీరు గురించి వారు ప్రధానంగా చర్చించినట్లు పార్టీ వర్గాలు చెబుతున్నాయి. రాష్ట్రంలో కాంగ్రెస్ పరిస్థితి మెరుగుపడాలంటే నాయకత్వాన్ని మార్చటంతోపాటు పార్టీ పరంగా పలు మార్పులు, చేర్పులు చేయాలంటూ పలువురు నాయకులు కాంగ్రెస్ అధినాయకత్వాన్ని కోరుతున్న తరుణంలో ఆజాద్‌తో కిరణ్‌కుమార్ రెడ్డి జరిపిన సమావేశానికి ఎంతో ప్రాధాన్యత ఉన్నదని అంటున్నారు. ఆజాద్‌తో జరిపిన చర్చల వివరాలను విలేఖర్లకు వెల్లడించేందుకు కిరణ్‌కుమార్ రెడ్డి నిరాకరిస్తూ, మీరు ఎంత ప్రయత్నించినా నాకు ఎలాంటి ఢోకా లేదంటూ ముందుకు సాగిపోయారు.