Posted: 06/29/2012 05:40 PM IST

అతడు రాజకీయ నాయకురాలు భర్త. ఆర్థికంగా ఉన్న వ్యక్తి. కానీ అతడు చేసేది మాత్రం దొంగతనం. అదేంటి అనుకుంటున్నారా ? ఈ స్టోరీ చదవండి. మహబూబ్‌నగర్ జిల్లా వెల్దండ మండలం బైరాపురం గ్రామానికి చెందిన రతలావత్ అమర్‌సింగ్ (48) అలియాస్ బిక్యాకు సొంత ఊరిలో 20 ఏకరాల వ్యవసాయ భూమి ఉంది. ఆయనకు ఊరిలోను, చంపాపేటలోని దుర్గభవానీనగర్‌లోను రెండతస్తుల భవనాలు ఉన్నాయి. వీటిపై అద్దెల రూపంగానే నెలకు రూ.20 వేల ఆదాయం వస్తుంటుంది. ఆయన భార్య విజయ వెల్దండ మండలం ఎంపీపీగా, బైరాపురం సర్పంచ్‌గా బాధ్యతలు నిర్వహించారు.

బానే ఉన్నా అమర్‌సింగ్ మాత్రం చోరకళలో ప్రావీణ్యం సంపాదించాడు. ఇతనిపై గతంలో సరూర్‌నగర్, కూకట్‌పల్లి, నల్గొండ పోలీస్‌స్టేషన్ల పరిధిలో సుమారు 8 కేసులు నమోదై ఉన్నాయి. ఈ నెల 21 రాత్రి కల్లు సేవించిన అమర్‌సింగ్.. గ్రీన్‌పార్క్ కాలనీలో తాళం వేసి ఉన్న ఇంట్లోకి చొరబడ్డాడు. బీరువా తెరిచి ఒక కిలో వెండి వస్తువులు తస్కరించాడు. సమీపంలోని మరో ఇంట్లోకి చొరబడి బీరువాలోని 28.3 తులాల బంగారు నగలు, 1.7 కిలోల వెండి ఆభరణాలు దొంగిలించాడు.

సొత్తును ఇంట్లో ఉంచి మరుసటి రోజు స్వగ్రామానికి వెళ్లిపోయాడు. బాధితుల ఫిర్యాదు మేరకు సైదాబాద్ పోలీసులు కేసు నమోదు చేసుకుని దర్యాప్తు ప్రారంభించారు. ఘటనా స్థలంలో క్లూస్ టీంకు దొరికిన వేలిముద్రల ఆధారంగా పాత నేరస్థుడు అమర్‌సింగే ఈ దొంగతనానికి పాల్పడినట్టు గుర్తించారు. అప్పటి నుంచి అతని కోసం మాటువేశారు. బుధవారం నగరానికి వచ్చిన అమర్‌సింగ్.. దొంగిలించిన సొత్తులో ఒక గొలుసును అమ్మడానికి చంపాపేటలో యత్నిస్తుండగా పట్టుకున్నారు. అనంతరం అతనిని విచారించి.. ఇంట్లో దాచిన పదిలక్షల విలువైన సొమ్మును స్వాధీనం చేసుకున్నారు. విశేషం ఏంటంటే... దొంతనం కేసులో జైలుకు వెళ్లి ఈ నెల 18న బెయిల్‌పై విడుదలైన ఆ ప్రబుద్ధుడు మూడురోజులకే మళ్లీ చోరీకి పాల్పడి దొరికిపోవడం.