Rail Minister Dinesh Trivedi Resigns

Posted: 03/16/2012 11:54 AM IST

Rail Minister Dinesh Trivedi resigns

రైల్వే మంత్రి దినేష్ త్రివేది మంత్రి పదవికి రాజీనామా చేయలేదని, త్రివేది లోక్‌సభలో ప్రతిపాదించిన 2012-13 సంవత్సరం రైల్వే బడ్జెట్‌కు ఎలాంటి ఢోకాలేదని లోక్‌సభ నాయకుడు, ఆర్థిక శాఖ మంత్రి ప్రణబ్ ముఖర్జీ ప్రకటించారు. లోక్‌సభ ప్రశ్నోత్తరాల కార్యక్రమం సమయంలో ప్రతిపక్షం రైల్వే శాఖ మంత్రి దినేష్ త్రివేది రాజీనామా చేసారంటూ చేసిన ఆరోపణలకు బదులిస్తూ ఈ విషయం తెలిపారు. దినేష్ త్రివేది రాజీనామా చేసినట్లు పత్రికల్లో వచ్చిన వార్తల్లో ఎలాంటి నిజం లేదు, ఆయన రాజీనామా చేయలేదు కాబట్టి మీరెవ్వరూ ఆందోళన చెందవలసిన అవసరం లేదన్నారు. త్రివేది లోక్‌సభలో ప్రతిపాదించిన రైల్వే బడ్జెట్‌కు ఎలాంటి ఢోకాలేదని, అది ఇప్పుడు సభ పరిధిలోని అంశం కాబట్టి దానికి ఎలాంటి ప్రమాదం లేదన్నారు. యుపిఏ మిత్రపక్షమైన తృణమూల్ కాంగ్రెస్ అధ్యక్షురాలు, పశ్చిమ బెంగాల్ ముఖ్యమంత్రి మమతా బెనర్జీ గత రాత్రి మన్మోహన్ సింగ్‌కు ఒక లేఖ రాశారు. ఈ లేఖ ప్రస్తుతం ప్రధాన మంత్రి పరిశీలనలో ఉందని ఆయన వివరించారు. మన్మోహన్ సింగ్ ఈ లేఖపై ఎలాంటి నిర్ణయం తీసుకున్నా దానిని సభ్యులకు తెలియజేయటం జరుగుతుందని ప్రణబ్ ముఖర్జీ వివరించారు. త్రివేది, రైల్వే బడ్జెట్, సంకీర్ణ ప్రభుత్వం మనుగడ గురించి ప్రతిపక్షానికి ఎలాంటి ఆందోళన అవసరం లేదంటూ ప్రణబ్ ముఖర్జీ వ్యంగ్య బాణాలు విసిరారు.