Trs Mp Vijayshanthi

Posted: 03/16/2012 11:20 AM IST

TRS MP Vijayshanthi మెదక్-అక్కన్నపేట రైల్వే లైన్‌కు కేంద్ర ప్రభుత్వం గ్రీన్‌సిగ్నల్ ఇవ్వడం పట్ల టీఆర్‌ఎస్ పార్టీ మెదక్ ఎంపీ విజయశాంతి సంతోషం వెలిబుచ్చారు. తన నివాసంలో ఏర్పాటు చేసిన విలేకరుల సమావేశంలో ఆమె మాట్లాడారు. ఈ రైల్వే లైన్ మంజూరు కోసం తాను ఎంతగానో కృషి చేశానని, చివరికి తన కల ఫలించిందని పేర్కొన్నారు. మెదక్-అక్కన్నపేట రైల్వే లైన్ పొడవు 17కిలోమీటర్లు కాగా ఈ లైన్ నిర్మాణానికి రూ. 114కోట్లు అవసరం అవుతాయని అంచనా వేసినట్లు చెప్పారు.
తెల్లాపూర్-పటాన్‌చెరు ఎంఎంటీఎస్ లైన్‌కూ కేంద్రం గ్రీన్‌సిగ్నల్ ఇచ్చిందని, ఈ ఎంఎంటీఎస్ మొత్తం పొడవు 9కిలోమీటర్లు కాగా ఈ రైల్వేలైన్ నిర్మాణానికి రూ. 33కోట్లు ఖర్చు అవుతుందని అంచనా వేసినట్లు వివరించారు. ఈ రెండు రైల్వే ప్రాజెక్టులు మంజూరు చేసినందుకు ప్రధాని, రైల్వే మంత్రి, రాష్ట్ర ముఖ్యమంత్రికి ఆమె ధన్యవాదాలు తెలిపారు. రైల్వే ప్రాజెక్టు పనుల్లో రాష్ట్ర ప్రభుత్వ వాటా కూడా ఉన్నందున ముఖ్యమంత్రికి ధన్యవాదాలు తెలుపడం తన కనీస బాధ్యత అన్నారు. తాను ఎప్పటికప్పుడు పట్టుదలతో ఫాలోఅప్ చేయడం వల్లే ఈ రెండు రైల్వే ప్రాజెక్టులు మంజూరయ్యాయని తెలిపారు