Posted: 12/12/2011 09:59 AM IST

అవిశ్వాస తీర్మానానికి అనుకూలంగా ఓటు వేసిన జగన్ వర్గం ఎమ్మెల్యేల పై కాంగ్రెస్ అధిష్టానం వేటుకు గ్రీన్ సిగ్నల్ ఇచ్చింది. దీని పై స్పీకర్ నిర్ణయం తీసుకోవడమే తరువాయి. జగన్ వర్గం ఎమ్మెల్యేల పై వేటు వేస్తే త్వరలో ఉప ఎన్నికలు నిర్వహిస్తారు. అయితే ఈ ఉప ఎన్నికలకు కాంగ్రెస్ పార్టీకి వ్యతిరేకంగా ఓటు వేస్తానని, తెలంగాణ వాదానికి అనుకూలంగా ఓటు వేస్తానని రాజ్యసభ సభ్యుడు కె.కేశవరావు స్పష్టం చేశారు. 

ప్రత్యేక రాష్ట్ర ఏర్పాటుకు అంగీకరించనంత వరకూ కాంగ్రెస్‌కు కష్టకాలమేనని, ఉప ఎన్నికల్లోనూ పెద్దగా అవకాశాలు ఉండకపోవచ్చని అన్నారు. తెలంగాణ వర్సెస్ నాన్ తెలంగాణ ప్రాతిపదికన ఎన్నికలు జరిగే అవకాశం ఉందన్నారు. సీమాంధ్రలో మాత్రం అత్యధిక స్థానాలు గెలుచుకుంటామని జోస్యం చెప్పారు. రాష్ట్రంలో తమ పార్టీ ప్రభుత్వాన్ని కూల్చాలన్న భావన లేదని, అలా ఎవరైనా అనుకుంటే అంతకన్నా పిచ్చోళ్లు ఉండరని ఒక ప్రశ్నకు జవాబిచ్చారు.

తెలంగాణకు ప్రాంతీయ మండళ్లు, ప్యాకేజీలను అంగీకరించేది లేదని తెగేసి చెప్పారు. ఈ మేరకు ఢిల్లీలో ఎంపీలంతా ఏకాభిప్రాయానికి వచ్చామన్నారు. తమకు 1956 నాటి హైదరాబాద్‌తో కూడిన తెలంగాణే కావాలని అధిష్ఠానానికీ చెప్పామన్నారు. డిసెంబర్ 9 నాటి ప్రకటనకు రెండేళ్లు పూర్తయిందని గుర్తుచేస్తూ ప్రధానికి లేఖ కూడా రాశామని చెప్పారు. దీనిపై ఆలోచిస్తున్నామని ప్రధాని, ప్రణబ్ వంటి పెద్దలు మాట ఇచ్చినట్లు పేర్కొన్నారు.