వెంటిలేటర్ పై.. నిలకడగానే మాజీ రాష్ట్రపతి ప్రణబ్ ముఖర్జీ అరోగ్యం..

Posted: 08/21/2020 06:36 PM IST

(Image source from: Ndtv.com)

మాజీ రాష్ట్రపతి ప్రణబ్‌ ముఖర్జీ ఆరోగ్య నిలకడగానే వుందని ఆర్మీ రిసర్చ్ అండ్ రిఫరల్ ఆసుపత్రి వర్గాలు వెల్లడించాయి, ఢిల్లీ కంటోన్మెంట్ ప్రాంతంలోని ఆర్మీ ఆసుపత్రిలో ప్రణబ్ ముఖర్జీ ఈ నెల 10వ తేదీని బ్రెయిన్ లో రక్తం గడ్డకట్టడంతో చేరిన విషయం తెలిసిందే. అయితే సర్జరీ చేయడంతో ఆయన ఆ తరువాత కోమాలోకి జారుకున్నారు. అయితే అప్పటి నుంచి ఆయన పరిస్థితి విషమంగానే ఉంది. సర్జరీ నుంచి వెంటిలేటర్ ను సాయంతోనే శ్వాస తీసుకుంటున్నారు. దీనికి తోడు ఆయనకు కరోనా పాజిటివ్ గా కూడా నిర్ధారణ అయ్యింది. ఇక సర్జీరీ నాటి నుంచి కోమాలోకి జారుకున్న ఆయన పరిస్థితి క్రమక్రమంగా దిగజారుతూ విషమంగా తయారైంది.

ఏ క్షణంలో ఎలాంటి వార్త వినాల్సి వస్తుందోనని అందోళన చెందిన ఆయన కుటుంబసభ్యులకు ఇవాళ శుభవార్తను అందించారు. ఇవాళ ఆర్మీ రిసర్చ్ అండ్ రిఫరల్ ఆసుపత్రి వైద్యులు విడుదల చేసిన హెల్త్ బులిటిన్ లో మాజీ రాష్ట్రపతి పరిస్థితి నిలకడగానే వుందని తెలిపారు. ఆయన వెంటిలేటర్ సాయంతోనే శ్వాస తీసుకుంటున్నా.. పరిస్థితి నిలకడగా వుందని అందోళన చెందాల్సిన అవసరం లేదని తెలిపారు. ప్రస్తుతం రక్తప్రసరణ సవ్యంగానే ఉందని, ఆయన‌ ఆరోగ్య పరిస్థితిని నిపుణుల బృందం నిశితంగా పర్యవేక్షిస్తోందని తాజాగా విడుదల చేసిన హెల్త్‌ బులెటిన్‌లో ఆర్మీ ఆసుపత్రి పేర్కొంది.