హైకోర్టుకు ‘దిశ’ నిందితుల పోస్టుమార్టం ప్రాథమిక నివేదక

Posted: 12/24/2019 04:36 PM IST

సంచలనం సృష్టించిన దిశ హత్యాచార కేసులోని నిందితుల మృతదేహాలకు దేశ రాజధాని న్యూఢిల్లీలోని ఎయిమ్స్ అసుపత్రి నుంచి వచ్చిన ఫోరెన్సిక్స్ నిపుణుల బృందం క్రితం రోజున పోస్టుమార్టం నిర్వహించిన విషయం తెలిసిందే. తెలంగాణ రాష్ట్రోన్నత న్యాయస్థానం హైకోర్టు అదేశాలు మేరకు ఎయిమ్స్ అసుపత్రికి చెందిన నిపుణులు పూర్తి పోస్టుమార్టం ప్రక్రియకు సంబంధించి చిత్రీకరించిన వీడియోను ఇవాళ న్యాయస్థానంలో సమర్పించారు.

దీనితో పాటుగా దిశ నిందితుల రీపోస్టుమార్టం ప్రాథమిక నివేదికను కూడా ఎయిమ్స్ వైద్యులు హైకోర్టులో సమర్పించారు. ఇవాళ ఉదయం సీడితో పాటు ప్రాథమిక నివేదికతో హైకోర్టుకు చేరకున్న ఎయిమ్స్ వైద్యులు హైకోర్టు రిజిస్ట్రార్ కు వాటిని సమర్పించారు. ఢిల్లీ ఎయిమ్స్ ఫోరెన్సిక్ హెచ్ వోడీ డాక్టర్ సుధీర్ గుప్తా, డాక్టర్ ఆదర్శ్ కుమార్, డాక్టర్ అభిషేక్ యాదవ్, డాక్టర్ వరుణ్ చంద్రలతో కూడిన బృందం దిశ నిందితుల మృతదేహాలకు రీపోస్టుమార్టం నిర్వహించిన సంగతి తెలిసిందే. పూర్తి స్థాయి నివేదికను వారం రోజుల్లో అందజేస్తామని వైద్యులు తెలిపారు.

రీపోర్టుమార్టం తరువాత నిందితుల మృతదేహాలను వారి కుటుంబసభ్యులకు పోలీసులు అందజేశారు. దీంతో రెండు అంబులెస్సులలో నాలుగు మృతదేహాలను వారి స్వగ్రామాలకు తరలించారు. గ్రామల వద్ద కూడా పోలీసులు బందోబస్తు నడుమ నిందితుల మృతదేహాలను కుటుంబసభ్యులు.. గ్రామస్థుల సహకారంతో తీసుకుని వెళ్లి అంత్యక్రియలను నిర్వహించారు. చీకటి పడడం.. రోడ్డుపై నుంచి గ్రామానికి దూరం కారణంగా మూడు ట్రాక్టర్లను కూడా ఏర్పాటు చేసిన గ్రామస్థులు రాత్రిలోపు అంత్యక్రియలను పూర్తి చేశారు.