కర్ణాటక సంక్షోభం.. కీలక తీర్పు ఇవ్వనున్న సుప్రీం!

Posted: 07/17/2019 11:03 AM IST

మలుపులు తిరుగుతున్న కర్ణాటక రాజకీయానికి సుప్రీంకోర్టు చెక్ పెడుతుందా? తీర్పు ఎలా ఉండబోతోంది? దాదాపు నెల రోజులుగా పరిపాలన అటకెక్కి... వ్యూహాలు, ప్రతివ్యూహాలతో వేడెక్కిన కర్ణాటకలో స్వార్థ రాజకీయాలకు ఇవాళ బ్రేక్ పడే అవకాశాలు కనిపిస్తున్నాయి. అటు ప్రభుత్వం, ఇటు ప్రతిపక్షం సుప్రీంకోర్టుకు వెళ్లటం... ప్రభుత్వం, రెబల్ ఎమ్మెల్యేలు వాదనలు వినిపించడంతో... సుప్రీంకోర్టు ఏం చెబుతుందన్నది ఆసక్తిగా ఉంది. తమ రాజీనామాలను స్పీకర్ రమేష్ కుమార్ ఆమోదించేలా ఆదేశించాలని కాంగ్రెస్, జేడీఎస్ నుంచీ 15 మంది రెబల్ ఎమ్మెల్యేలు కోరుతున్నారు. స్పీకర్ తమ రాజీనామాల విషయంలో కావాలనే లేటు చేస్తున్నారని రెబెల్స్ అంతా సుప్రీంకోర్టును ఆశ్రయించారు. దీనిపై సుప్రీంకోర్టు విచారణ చేపట్టింది. రాజీనామాల విషయంలో సర్వోన్నత న్యాయస్థానం నుంచి తీర్పు వెలువడేంత వరకు యధాతథ స్థితిని కొనసాగించాలని స్పీకర్‌ను సుప్రీంకోర్టు ఆదేశించింది. సంకీర్ణ ప్రభుత్వం బల పరీక్షకు కొన్ని గంటలే సమయం ఉంది. దీంతో ఇవాళ సుప్రీం తీర్పు ఎలా ఉంటుందోననే సర్వత్రా ఆసక్తి నెలకొంది. తీర్పు తమకు అనుకూలంగా రాకపోతే ఏం చేయాలనే అంశంపై రెబెల్స్‌ తర్జనభర్జన అవుతున్నారు.. ఇటు రాజకీయ పార్టీల్లో, అటు కన్నడ ప్రజల్లో తాజా పరిణామాలు ఉత్కంఠ పెంచుతున్నాయి.