బీజేపి గూటికే వైసీపీ: బండారు దత్తత్రేయ సంచలన వ్యాఖ్యలు

Posted: 04/01/2019 12:58 PM IST

Bjp mp bandaru dattatreya sensational comments on ycp and federal front

కేంద్ర మాజీ మంత్రి, బీజేపీ సీనియర్ నేత బండారు దత్తాత్రేయ సంచలన వ్యాఖ్యాలు చేశారు. ఇప్పటికే బీజేపి వైసీపీ మధ్య చీకటి ఒప్పందం వుందన్న వార్తలు వినిపిస్తున్న క్రమంలో ఎన్నికల తరువాత వైసీపీ తప్పకుండా బీజేపి గూటికి చేరవల్సిందేనని అన్నారు. తాజా రాజకీయ పరిస్థితులపై విశ్వేషించిన ఆయన వైసీపీ పార్టీయే కాకుండా ఇటు తెలంగాణలో టీఆర్ఎస్ పార్టీ కూడా తమ గూటికే చేరుతుందని వ్యాఖ్యానించారు.

తెలంగాణ ముఖ్యమంత్రి చెబుతన్న ఫెడరల్ ఫ్రంట్ లోని పార్టీలన్నీ కూడా తప్పక బీజేపి గూటికే చేరుతాయని ఆయన జోస్యం చెప్పారు. కేసీఆర్ ఫెడరల్ ఫ్రండ్ స్వప్నం అవిష్కృతం కాదని, ఆ తరుణంలో ఆ ఫ్రంట్ లోని చాలావరకు పార్టీలు ఎన్డీయేలో చేరతాయని ఆశాభావం వ్యక్తం చేశారు. ఇక అంతటితో ఆగని మాజీ మంత్రి.. సమయం అనుకూలిస్తే మళ్లీ టీడీపీ కూడా ఎన్డీయే పక్షాన చేరే అవకాశం ఉందని అన్నారు. ఈ ఎన్నికల్లో బీజేపీకి వ్యతిరేకంగా పనిచేస్తున్న రాజకీయ పక్షాలకు ఎన్నికలు పూర్తయ్యాక ఎన్డీయేనే దిక్కు అని వ్యాఖ్యానించారు.

ప్రధాని నరేంద్ర మోదీపై ఇష్టం వచ్చినట్టు మాట్లాడుతున్న తెలుగు రాష్ట్రాల ముఖ్యమంత్రులు చంద్రబాబు, కేసీఆర్ దేశ ప్రజలకు క్షమాపణలు చెప్పాలంటూ దత్తన్న డిమాండ్ చేశారు. యూపీఏ హయాంలో 11 సార్లు సర్జికల్ స్ట్రయిక్స్ జరిగాయంటున్న కేసీఆర్, ఒక్కసారైనా క్యాబినెట్ మీటింగ్ కు హాజరయ్యారా? అని ప్రశ్నించారు. పార్లమెంటులో ఒక్కరోజు కూడా మంత్రిగా సమాధానం చెప్పని వ్యక్తి, 11 సార్లు సర్జికల్ స్ట్రయిక్స్ జరిగాయంటే నమ్మేదెవరు? అని అన్నారు. ఆయనకు సర్జికల్ దాడుల గురించి ఏం తెలుసని నిలదీశారు.