మాజీ క్రికెటర్ భార్యతో బాలీవుడ్ సింగర్ అసభ్య ప్రవర్తన..

Posted: 07/02/2018 10:29 AM IST

టీమిండియా మాజీ క్రికెటర్ వినోద్ కాంబ్లీ కాసింత దూకుడు స్వభావంతోనే క్రికెట్ కెరీర్ లో ఉన్నత శిఖరాలను అధిరోహించలేకపోయాడన్నది క్రికెట్ విశ్లేషకులు అభిప్రాయం. సచిన్ తో పాటు కెరీర్ ప్రారంభించిన కాంబ్లీ.. సచిన్ ను అందుకోలేనంత స్థాయికి పడిపోయాడు. ఇప్పుడు తన తప్పులు తెలుసుకుని అందరితో అప్యాయంగా మసలుతున్న వినోద్ కాంబ్లీకి తాజాగా మళ్లీ చిక్కులు వచ్చిపడ్డాయి. ఆయన భార్య కూడా అలాంటి స్వభావంతోనే వ్యవహరించారని అమెపై పోలీస్ పిర్యాదు నమోదయ్యింది. ఈ మేరకు బాలీవుడ్ సింగర్ అంకిత్ తివారీ తండ్రి ఈ ఫిర్యాదు చేశాడు.

వివరాల్లోకి వెళితే.. ముంబై ఇనార్బిట్ మాల్ లో క్రితం రోజున నిర్వహించిన ఓ కార్యక్రమంలో అహుతులు పెద్దసంఖ్యలో హాజరయ్యారు. ఈ కార్యక్రమానికి మాజీ క్రికెటర్ వినోద్ కాంబ్లీతోపాటు అతని భార్య ఆండ్రియా కూడా హాజరయ్యారు. ఇదే కార్యక్రమంలో బాలీవుడ్ సింగర్ అంకిత్ తివారీ, అతని తండ్రి కూడా పాల్గొన్నారు. ఓ అంశంపై వినోద్ కాంబ్లీ భార్య ఆండ్రియా.. అంకిత్ తో వాదనకు దిగారు. ఈ క్రమంలో మాట మాట పెరిగింది. దీంతో సహనం కోల్పోయిన ఆండ్రియా.. అంకిత్ పై చేయిచేసుకున్నది.

అయితే తన ముందే తన కన్న కొడుకుపై అండ్రియా చేయిచేసుకున్న నేపథ్యంలో సహించలేకపోయిన అంకిత్ తండ్రి వెంటనే పోలీస్ స్టేషన్ కు వెళ్లి.. అండ్రియాపై కేసు పెట్టాడు. దీనిపై కాంబ్లీ కూడా స్పందించాడు. ఆండ్రియాతో అసభ్యంగా ప్రవర్తించాడని, అమె చేయి పట్టుకున్నాడని.. ఈ క్రమంలో అమె ప్రశ్నించడంతో.. అతను మరింతగా రెచ్చిపోవడం.. అనుచిత ప్రవర్తన, అసభ్యపదజాలం వినియోగించడంతోనే  అమె చేయి చేసుకోవాల్సి వచ్చిందని చెప్పుకొచ్చాడు. కాగా, మొదటగా అంకిత్ తండ్రి నుంచి ఫిర్యాదు రావటంతో కేసు నమోదు చేసి విచారణ చేస్తున్నామని పోలీసులు తెలిపారు. ఇప్పటి వరకు కాంబ్లీ ఫ్యామిలీ మాత్రం ఎలాంటి కంప్లయింట్ ఇవ్వలేదు. అంకిత్ వ్యవహరించిన తీరుపైనా ఆండ్రియా కంప్లయింట్ చేయనున్నట్లు తెలుస్తోంది.