ప్లీజ్.. నాపై గుడ్లు వేయండి!

Posted: 06/16/2017 09:54 AM IST

ఛాన్స్ దొరికిన ప్రతీసారి మిత్రపక్షాలతో కలిసి కేంద్రంలోని బీజేపీని ఇరకాటంలో పెట్టాలనే కాంగ్రెస్ తీవ్రంగా యత్నిస్తోంది. అయితే తాము చేసే అభివృద్ధి పనులతో వాళ్ల ఆరోపణలు గాల్లోనే కొట్టుకుని పోతాయంటున్నాడు బెంగాలీీ సింగర్, భారీ పరిశ్రమల శాఖ(మినిస్టర్ ఆఫ్ స్టేట్) మంత్రి బాబుల్ సుప్రియో. ఒడిశా పర్యటనలో ఉన్న బాబుల్ మంత్రులపై జరుగుతున్న దాడులపై సీరియస్ గా స్పందించాడు.

మూడు రోజుల క్రితం మహానది జల వివాదం పై చర్చించేందుకు కేంద్ర గిరిజన సంక్షేమ శాఖ మంత్రి జుయల్ ఓరం, కేంద్రపారా జిల్లాలోని అవుల్ బజార్ కు వెళ్లాడు. మందాసార్ ఘటనకు వ్యతిరేకంగా బీజేడీ, కాంగ్రెస్ ఆందోళనలు నిర్వహించాయి. ఈ క్రమంలో బీజేడీ కార్యకర్తలు మంత్రి కాన్వాయ్ పై గుడ్లు విసిరి కొట్టగా, కాంగ్రెస్ నల్ల జెండాలతో నిరసన వ్యక్తం చేసింది. దీనిపై బాబుల్ ఘాటుగానే స్పందించాడు. 

తాను మాంసాహారినని, ఒకవేళ ఎవరైనా తనపై గుడ్లు విసిరితే వాటితోనే ఆమ్లెట్‌ వేసుకుంటానని బాబుల్‌ సుప్రియో పేర్కొన్నాడు. ఇలాంటి చర్యలతో భయపెట్టాలని భావిస్తే, తనలో ఇసుమంతైనా భయం కలగదని అన్నారు.ఇక్కడి( ఒడిశా) కంటే ఎక్కువ రాజకీయ సమస్యలు, స్తబ్థత ఎక్కువగా ఉన్న పశ్చిమ బెంగాల్ నుంచి తాను వచ్చానని, ఎవరూ తనను భయపెట్టలేరని బాబుల్ స్పష్టం చేశాడు.