రేప్ కేసులో ఎమ్మెల్యేకు కొత్త ట్విస్ట్

Posted: 02/13/2017 01:22 PM IST

ఉత్తరప్రదేశ్ లో ఓ యువతి హత్య సంచలనంగా మారింది. అందుకు కారణం ఆమె ఒక అత్యాచార బాధితురాలు కావటమే. పై పెచ్చు అత్యాచారం చేసినవారిలో అధికార పక్షం సమాజ్ వాదీ పార్టీకి చెందిన ఓ ఎమ్మెల్యే కూడా ఉన్నాడంటూ ఆ యువతి ఆరోపించటమే. దీంతో ఆ ఎమ్మెల్యేపై హత్య కేసు నమోదు చేశారు పోలీసులు.

వివరాల్లోకి వెళ్లితే.. సుల్తాన్ పూర్ కు చెందిన 22 ఏళ్ల యువతిపై 2013 లో సామూహిక అత్యాచారం జరిగింది. అందులో స్థానిక ఎమ్మెల్యే అరుణ్ వర్మ కూడా ఉన్నాడంటూ ఆ యువతి, ఆమె తల్లిదండ్రులు పోలీసులకు ఫిర్యాదు కూడా చేశారు. ఈ కేసు మూడేళ్లవుతున్నా విచారణ ఇంత వరకూ పూర్తవలేదు. పైగా దోషులు తప్పించుకునేందుకు ఖాకీలు సాయం చేస్తున్నారన్న విమర్శలు కూడా వినిపించాయి. దర్యాప్తుపై తనకు నమ్మకం లేదని యువతి చాలా సార్లు మీడియా ముందుకు వచ్చి చెప్పింది కూడా. ఇంతలో పోలీసులు ఎమ్మెల్యేకు క్లీన్ చీట్ ఇవ్వటం, స్థానిక యువకులపై కేసు నమోదు చేయటం వివాదాస్పదంగా మారింది.

 

ఇదిలా ఉంటే శనివారం ఇంటి బయట ఉన్న బాత్ రూం కు వెళ్లిన యువతి ఎంతకు తిరిగి రాలేదు. దీంతో తల్లిదండ్రులు కంగారుపడి పోలీస్ ఫిర్యాదు చేయగా, ఆదివారం సమీపంలోని పోదల్లో శవం కనిపించింది. గొంతు నులిమినట్లు స్పష్టంగా తెలియటంతో పోస్ట్ మార్టం కోసం శవాన్ని ఆస్పత్రికి తరలించారు. తమకు ఆ ఎమ్మెల్యే నుంచి హని ఉందన్న విజ్నప్తితో ఇంత కాలం రక్షణ కల్పించారు పోలీసులు. ఈ మధ్యే వారిని వెనక్కి తీసుకుంది పోలీస్ శాఖ. ఆ వెనువెంటనే యువతి అనుమానాస్పద స్థితిలో చనిపోయి విగత జీవిగా ఉండటం పలు అనుమానాలకు తావిస్తోంది.

ఇక తల్లిదండ్రుల ఫిర్యాదు మేరకు ఎమ్మెల్యేపై మర్డర్ కేసు ఫైల్ చేసినట్లు స్థానిక అధికారి ఒకరు తెలిపారు. కాగా, సుల్తాన్ పూర్ నుంచి ఈ దఫా ఎన్నికల్లో కూడా అరుణ్ పోటీ చేస్తుండటం విశేషం. ఫిబ్రవరి 27న ఆ స్థానానికి ఎన్నిక జరగనుంది.