పుండు మీద కారం చల్లిన అర్బీఐ.. మళ్లీ షాక్..

Posted: 11/30/2016 10:48 AM IST

అవినీతి, నల్లకుబేరుల పని పడతామంటూ అర్భాంటంగా కేంద్రం తీసుకున్న నిర్ణయం ఇప్పటికే దేశప్రజల పాలిట శాపంగా పరిణమించిందని, అవసరాలకు డబ్బును విత్ డ్రా చేసుకునేందుకు ఏటీయం కేంద్రాలకు వెళ్తే అక్కడ డబ్బులు లేని మిషన్లు వెక్కిరిస్తూ వెనక్కి పంపిస్తున్నాయని, ఇక బ్యాంకులకు వెళ్తే చెంతాడంత క్యూలలో నిల్చోని గంటల తరబడి నిరీక్షించాల్సి వస్తున్న నేపథ్యంలో భారతీయ రిజర్వ్  బ్యాంక్ పుండు మీద కారం చల్లిందన్న చందంగా మరో్ షాక్ ఇచ్చింది. ప్రధానమంత్రి నరేంద్ర మోదీ ప్రకటించిన ఆపరేషన్ బ్లాక్ మనీ పథకంలో భాగంగా  అక్రమార్కులకు చెక్ పెట్టేందుకు రిజర్వు బ్యాంకు మరో కీలక నిర్ణయం తీసుకుంది.  

నల్లకుబేరుల వలలో అమాయక రైతులు చిక్కుకోకుండా.. వారికి ఎట్టి పరిస్థితుల్లో లోంగకుండా వుండేందుకు అర్బీఐ ఇప్పటివరకు వున్న నగదు విత్ డ్రా పరిమితులను అమాంతంగా తగ్గించింది. బినామీ ఆస్తి లావాదేవీ, డబ్బు లావాదేవీల నుంచి అమాయక రైతులు, గ్రామీణ ఖాతాదారుల రక్షించడానికి వీలుగా  విత్ డ్రా పరిమితిని పదివేలకు కుదిస్తున్నట్టు వెల్లడించింది. కేవైసి ఫిర్యాదు ఖాతాదారులకు నెలలో పదివేలు, నాన్ కేవైసి ఖాతాదారులకు  ఒక నెలలో అయిదువేలు విత్ డ్రాకు అనుమతినిస్తూ ఆర్బీఐ ఒక ప్రకటన జారీ చేసింది.

ముఖ్యంగా గ్రామీణ ప్రాంతాల రైతులు, ఇతర ఖాతాదారులకు అక్రమ లావాదేవీల నుంచి రక్షణ కల్పించేందుకుగాను ముందు జాగ్రత్త చర్యగా ఈ నిర్ణయం తీసుకున్నట్టు వెల్లడించింది. అలాగే 10వేలకు పైన విత్ డ్రాకు  సరియైన ఆధారాలు, పత్రాలు చూపించిన తరువాత బ్యాంక్ మేనేజర్ అనుమతితో అనుమతి ఉంటుందని స్పష్టం చేసింది. నాన్ కేవైసీ ఖాతాదారుల గరిష్ట విత్ డ్రా పరిమితిని  పదివేలుగా నిర్ణయించింది.