జకీర్ కు మరో బిగ్ షాక్...

Posted: 11/16/2016 07:32 AM IST

వివాదాస్పద ఇస్లామిక్ మత ఉపన్యాసకుడు జకీర్ నాయక్ కు కేంద్రం గట్టి షాక్ ఇచ్చింది. అతని ఆధ్వర్యంలో నడుస్తున్న ఓ ఎన్టీవో సంస్థ పై నిషేధం విధిస్తున్నట్లు మంగళవారం ప్రకటించింది.

బంగ్లాదేశ్ లోని ఓ రెస్టారెంట్ లో దాడులకు పాల్పడిన ఉగ్రవాదులు జకీర్ నాయక్ ప్రసంగాలతో ప్రేరేపించబడి దాడులకు పాల్పడినట్టు ప్రకటించిన సంగతి తెలిసిందే. ఈ నేపథ్యంలో ఆయనపై వచ్చిన ఆరోపణల నిగ్గుతేల్చేందుకు దర్యాప్తు ప్రారంభించిన సంగతి తెలిసిందే. ఈ క్రమంలోనే అతని ఎన్జీవో సంస్థ ఇస్లామిక్ రీసెర్చ్ ఫౌండేషన్ (ఐఆర్ఎఫ్‌) పై ఐదేళ్లపాటు నిషేధం విధిస్తూ ప్రభుత్వం నిర్ణయం తీసుకుంది. ఈ సందర్భంగా జకీర్ నాయక్ సంస్థ అనేక చట్ట విరుద్ధ కార్యకలాపాలకు, అక్రమ లావాదేవీలకు పాల్పడిందని, అందుకే ఐదేళ్ల నిషేధం విధించడం జరిగిందని హోంమంత్రిత్వ శాఖ తెలిపింది.

కాగా, తనపై అసత్య ఆరోపణలు చేశారంటూ జకీర్ నాయక్ గతంలో ఓ టీవీ ఛానెల్ సీఈవోపై 500 కోట్ల రూపాయలకు పరువు నష్టం దావా వేశాడు. అంతేకాదు తనను ఇలాంటి వివాదాలు చుట్టుముడుతుండటంతో ఏడాది తరువాతే భారత్ కు వస్తానని ఓ ఆన్ లైన్ ఇంటర్వ్యూలో చెప్పాడు కూడా. అరెస్ట్ భయంతో ఈ మధ్య అతని తండ్రి చనిపోతే అంత్యక్రియలకు కూడా రాలేదు.