గుడి దొంగను పట్టించింది ఏంటో తెలుసా?

Posted: 06/29/2016 10:16 AM IST

గుడికి కన్నం వేసి నగలు దొంగతనం చేసిన ఓ కిలాడీని చాలా విచిత్రంగా పట్టుకున్నారు పోలీసులు. ఢిల్లీలోని షెరావలి టెంపుల్ లో ఈ నెల 23న చోరీ జరిగింది. అమ్మవారి కిరీటంతోపాటు నగ కూడా ఎత్తుకెళ్లిపోయారు. దీంతో రంగంలోకి దిగిన పోలీసులు ఆ దొంగను భలేగా పట్టుకున్నారు.

ఆలయంలోని సీసీటీవీ పుటేజీని పరిశీలించగా అందులో నిందితుడి మొహం సరిగ్గా కనిపించలేదు. కానీ, అతడు ధరించిన టీషర్ట్ మీద 52-జీఏఐఎన్ఐ అని రాసి ఉంది. ఇక అది పట్టుకున్న పోలీసులు సమీపంలో గాలింపులు చేపట్టారు. అక్కడికి కొన్ని కిలోమీటర్ల దూరంలోని ఓ గురుద్వారా వద్ద సరిగ్గా అలాంటి టీ షర్ట్ ధరించిన వ్యక్తిని పట్టుకున్నారు పోలీసులు. ఆపై అతని కదలికలు అనుమానం రావటంతో తమదైన శైలిలో విచారించారు. దీంతో మొత్తం నిజం కక్కేశాడు.

డార్జిలింగ్ కు చెందిన డేవిడ్ ప్రధాన్ ఢిల్లీలోని ఓ ఫైవ్ స్టార్ హోటల్ లో వెయిటర్ గా పని చేస్తున్నాడు. ఈ నెల 23న ఆలయం వద్దకు వెళ్లిన అతను గర్భగుడిలో పూజారీ లేకపోవటంతో లోపలికి వెళ్లి తన చేతివాటం చూపాడు. కిరీటంతోపాటు, నెక్లెస్ తో ఉడాయించాడు. చివరకు పోలీసులు తైమూర్ నగర్‌లోని అతడి ఇంటి నుంచి ఆభరణాలను రికవరీ చేసుకున్నారు.