ఆ బ్యాగ్ నిండా కరెన్సీ కట్టలే.. బిత్తరపోయిన స్థానికులు

Posted: 12/02/2015 03:02 PM IST

నవ్యాంధ్ర రాజకీయ రాజధాని విజయవాడలో చోటుచేసుకున్న ఘటన రాష్ట్రవ్యాప్తంగా పెను చర్చనీయాంశమైంది. నిత్యం వందలాది మందితో రద్దీగా ఉండే ప్రదేశం. అక్కడ ఓ బ్యాగ్ పడి ఉంది. చాలా సమయం నుండి అది అలాగే ఉండటాన్ని గమనించిన స్థానికులు ఉత్సుకతను ఆపుకోలేక అందులో ఏముందో అని తెరిచి చూశారు. అంతే ఒక్కసారిగా షాక్కు గురయ్యారు. నడిరోడ్డుపై పడి ఉన్న ఓ బ్యాగును తెరచి చూడగానే దాని నిండా డబ్బు కట్టలు వున్నాయి.

సాదాసీదాగా కనిపిస్తున్న ఆ బ్యాగులో రూ.10 లక్షల విలువ చేసే నోట్ల కట్టలు బయటపడ్డాయి. విషయం తెలుసుకున్న స్థానికులు అక్కడికి చేరుకుని చర్చించుకుంటుండగా, బైక్ పై వెళుతున్న ఓ వ్యక్తి సదరు బ్యాగును పడేసుకుని వెళ్లాడని తేలింది. అయితే ఆ వ్యక్తి ఎవరన్న విషయం మాత్రం తెలియరాలేదు. నగరంలోని మొఘల్ రాజపురం సమీపంలోని భాష్యం పబ్లిక్ స్కూలు వద్ద ఈ ఘటన చోటుచేసుకుంది. డబ్బు కట్టలను ఆసక్తిగా పరిశీలించిన స్థానికులు ఆ తర్వాత వాటిని పోలీసులకు అప్పగించారు.

జి. మనోహర్