ఫైర్: ప్రమాదంలో ‘ప్రధాని’ పదవి!

Posted: 11/04/2015 04:02 PM IST

Romania pm victor ponta resigns his post over bucharest nightclub fire

ఓ నైట్‌క్లబ్‌లో అనుకోకుండా జరిగిన భారీ అగ్ని ప్రమాదం ఏకంగా ‘ప్రధాని’ పదవికే ఎసరు పెట్టింది. ఆ దుర్ఘటన జరిగిన నేపథ్యంలో వెల్లువెత్తిన నిరసనన, ఆందోళనలను సదరు దేశ ప్రధానిని తీవ్రంగా కలచివేయడంతో ఆయన తన పదవికి రాజీనామా చేసేందుకు సిద్ధమయ్యారు. ఓ అగ్నిప్రమాదం కారణంగా ఏకంగా దేశ ప్రధాని తన పదవికి రాజీనామా చేయడంతో ఈ విషయం ప్రపంచాన్ని ఆశ్చర్యంలో ముంచెత్తింది.

ఇటీవల రొమేనియాలోని బుకారెస్ట్‌లో గల ఓ నైట్‌క్లబ్‌లో పేలుడు, అగ్నిప్రమాదం సంభవించింది. ఈ ఘటనలో 33 మంది మరణించగా.. దాదాపు 180 మందికిపైగా తీవ్రంగా గాయపడ్డారు. టపాసులతో కూడిన రాక్ సంగీత కచేరీ నిర్వహించిన సందర్భంగా ఈ ప్రమాదం జరిగినట్లు రొమేనియా ప్రభుత్వాధికారులు తెలిపారు. కానీ, క్లబ్ లోపల టపాసులు కాల్చేందుకు ప్రయత్నించడం వల్లే ఈ దారుణం జరిగిందని ప్రత్యక్ష సాక్షులు చెప్పారు. ఏదేమైనా.. ఈ ఘటనకు బాధ్యత వహించి వెంటనే ప్రధాని రాజీనామా చేయాలని, ప్రభుత్వం అవినీతిమయంగా మారిందని భారీ ఎత్తున ఆందోళనకారులు బుకారెస్ట్ వీధుల్లోకి వచ్చి ఆందోళన నిర్వహింటారు. విశేషం ఏమిటంటే.. ఈ ఆందోళనలో దాదాపు 20 వేలమంది పాల్గొన్నారు. ఈ నేపథ్యంలోనే కొన్ని హింసాత్మకమైన ఘటనలు కూడా చోటు చేసుకున్నాయి.

ఈ విధంగా భారీగా ఆందోళన వెల్లువెత్తడంతో ఆశ్చర్యానికి గురైన ఆ దేశ ప్రధాని విక్టోర్ పాంటా.. తన పదవికి రాజీనామా చేసే ఆలోచన చేస్తున్నట్లు సోషల్ డెమొక్రటిక్ నేత లియు డ్రాగ్నియా తెలిపారు. 'నా బాధ్యతలు ఎవరికైనా అప్పగించాలనుకుంటున్నాను. నేను రాజీనామా చేస్తున్నాను' అని పాంటా చెప్పినట్లు డ్రాగ్నియా చెప్పారు. ఆ ఘటనకు బాధ్యత వహించి పార్టీ నేతలతో చర్చించిన తర్వాత ప్రధాని పదవికి పాంటా రాజీనామా చేస్తారని తెలుస్తోంది.