మోదీని బ్రహ్మపిశాచి అనేశాడు

Posted: 10/09/2015 04:34 PM IST

ఎన్నికల సిత్రాలు ఎన్నో వింతలక, విడ్డూరాలకు చోటిస్తాయి. మాటల తూటాలకు అయితే ఆకాశమే హద్దుగా ఉంటుంది. అందుకే మరి బీహార్ ఎన్నికల్లో నాయకుల మధ్య మాటల తూటాలు మామూలుగా పేలడం లేదు. తారా స్థాయిలో నడుస్తున్న బీహార్ ఎన్నికల సభల్లో మాటల సమరం అంతకంతకు తారా స్థాయికి చేరుతున్నాయి. నిన్నటి సభలో మోదీ లాలూ ప్రసాద్ యాదవ్ ను ఎద్దేవా చేశారు. పాపం లాలూ ప్రసాద్ యాదవ్ కు షైతాన్ పట్టిందని.. అయినా అంత మంది సభలో ఉండగా లాలూ ప్రసాద్ నే షైతాస్ ఎందుకు పట్టుకుంది అని మోదీ ప్ర్రశ్నించారు. అంతకు ముందు లాలూ ప్రసాద్ యాదవ్ ఎన్నికల సభలో మాట్లాడుతూ.. హిందువులు కూడా గోమాంసాన్ని తింటున్నారని అన్నారు. అయితే మీడియా మిత్రులు దాని మీద ప్రశ్నించడంతో వెంటనే ఆ టైంలో నాకు షైతాన్ పట్టుకుందని సమాధానం ఇచ్చారు. అయితే తాజాగా లాలూ ప్రసాద్ యాదవ్ మోదీ మీద తీవ్ర స్థాయిలో విరుచుకుపడ్డారు.

బీహార్ లో వాతావరణం చాలా వేడి ఉంది. అక్కడి నాయకుల మాటలతో యుద్దాలు జరుగుతున్నాయి. మాటల తూటాలకు అక్కడి ప్రజలు విలవిలలాడుతున్నారు. లాలూ ప్రసాద్ యాదవ్ మోదీ మీదకు కయ్యానికి సిద్దపడితే.. మోదీ కూడా కయ్యానికి సిద్దం అని తొడగొట్టారు. అందుకే లాలూ ప్రసాద్ యాదవ్ ను షైతాన్ అని సంబోదించిన మోదీకి లాలూ తాజాగా కౌంటర్ వేశారు. నరేంద్ర మోదీని బ్రహ్మపిశాచి అని సంబోదించిన లాలూ.. బ్రహ్మపిశాచిని ఎలా వదిలించాలో కూడా డాక్టర్ గా లాలూనే పరిష్కారం చెబుతున్నారు. పొగవేసి.. ఎండు మిర్చిలు కాలిస్తే పట్టిన బ్రహ్మపిశాచి బీహార్ ను పరుగెడుతుందని లాలూ అన్నారు. మొత్తానికి మోదీ లాలూను షైతాన్ అనడం.. లాలూ మోదీని బ్రహ్మపిశాచి అనడంతో మీడియా వాళ్లకు వార్తలు చూసే జనాలకు ఎంటర్ టెన్ మెంట్ ఉంది.

*అభినవచారి*