కమ్యూనికేషన్ శాటిలైట్ జీశాట్-6 ప్రయోగానికి కొనసాగుతున్న కౌంట్‌డౌన్

Posted: 08/26/2015 08:35 PM IST

శ్రీహరి కోటలోని సతీష్ ధావన్ స్పేస్ సెంటర్ మరో రాకెట్ ప్రయోగానికి సిద్ధమైంది. దేశీయ కమ్యూనికేషన్ వ్యవస్థలో అధునాతన సాంకేతిక పరిజ్ఞానాన్ని అందించే జీశాట్-6 ఉపగ్రహాన్ని ఇస్త్రో నింగిలోకి పంపనుంది. గురువారం సాయంత్రం 4.52 నిమిషాలకు రాకెట్ ప్రయోగం జరగనుంది. రాకెట్ ప్రయోగం కోసం ఇవాళ ఉదయం 11.52 నిమిషాల నుంచి 29 గంటల పాటు కౌంట్‌డౌన్ ప్రారంభమై కొనసాగుతోంది. జీశాట్-6 ఉపగ్రహాన్ని నిర్దేశిత కక్ష్యలోకి పంపేందుకు దేశీయ ఉపగ్రహ వాహన నౌక జీఎస్ఎల్వీ డీ-6ను ఇస్త్రో సిద్ధం చేసింది. సతీష్ ధావన్ స్పేట్ సెంటర్‌లోని రెండవ లాంచ్ పాడ్ నుంచి శాస్త్రవేత్తలు ఈ ప్రయోగం నిర్వహించనున్నారు. దేశీయ కమ్యునికేషన్ వ్యవస్థను పటిష్ఠం చేసేందుకు జీశాట్-6 ఉపగ్రహం ఉపయోగపడుతుంది.
 
ఈ ఉపగ్రహం బరువు 2,117 కేజీలు. రాకెట్ ప్రయోగానికి శాస్త్రవేత్తలు అన్ని ఏర్పాట్లు చేశారు. ఇందులో భాగంగా భారీ భద్రత నడుమ జీఎస్ఎల్వీ డీ-6ను రెండవ లాంచ్‌పాడ్‌కు తరలించారు. జీశాట్-6 శాటిలైట్ దేశీయ కమ్యునికేషన్ వ్యవస్థకు సంబంధించింది. మల్టీమీడియా శాటిలైట్ ఫోన్లకు ఈ ఉపగ్రహ టెక్నాలజీ ఉపయోగించనున్నారు. ముఖ్యంగా ఈ ఉపగ్రహంలో పది ట్రాన్స్‌పాండర్లను పంపుతున్నారు. ఫలితంగా ఇప్పటి వరకు ఉన్న ట్రాన్స్‌పాండర్ల కొరత తీరినట్లవుతుంది. రాకెట్ ప్రయోగం కోసం ఇస్త్రో రూ. 250 కోట్లు ఖర్చు పెడుతుంది. ఈ ప్రయోగం విజయవంతం అయితే దేశీయ కమ్యూనికేషన్ వ్యవస్థలో జీశాట్-6 25వ ఉపగ్రహంగా నిలువనుంది.

జి. మనోహర్