మరో విద్యార్థిని సూసైడ్.. హాస్టల్ లో ఉరేసుకున్న రవళి

Posted: 08/20/2015 11:32 AM IST

Another degree girl ravali suicide hanged herself hostel room gudur drw women degree college

గుంటూరులోని ఆచార్య నాగార్జున యూనివర్సిటీలో ఆత్మహత్య చేసుకున్న రిషితేశ్వరి కేసు తీవ్ర కలకలం రేపినప్పటి నుంచి కాలేజీల్లో విద్యార్థినుల బలవన్మరణాలు మరింత పెరుగుతున్నాయి. ర్యాగింగ్ భూతానికి బలైన రిషితేశ్వరి కేసు ఇంకా కొనసాగుతుండగానే ఇటీవలే కడప జిల్లాలోని నారాయణ కాలేజీలో ఇద్దరు విద్యార్థినుల ఆత్మహత్యలు చేసుకున్నారు. వీరిద్దరి ఆత్మహత్యల వెనుక అసలు కారణమేంటో తెలుసుకునేందుకు పోలీసులు విచారణ చేపట్టిన నేపథ్యంలోనే తాజాగా మరో విద్యార్థిని బలవన్మరణానికి పాల్పడింది. ఈ ఘటన గూడూరులోని డీఆర్ డబ్ల్యూ మహిళా డిగ్రీ కళాశాలలో జరిగింది.

కళాశాల హాస్టల్ గదిలో ఫస్టియర్ చదువుతున్న విద్యార్థిని రవళి ఉరేసుకుని మరణించింది. రవళి ఉరేసుకుని ఉండటాన్ని చూసిన ఇతర విద్యార్థినులు వెంటనే కళాశాల అధికారులకు సమాచారం ఇచ్చారు. దీంతో అధికారులు పోలీసులకు సమాచారం అందించగా.. వారు ఘటనా స్థలికి చేరుకున్నారు. రవళి ఆత్మహత్యకు దారితీసిన కారణాలపై విచారణ జరుపుతున్నారు. ఉన్నట్టుండి ఈ అమ్మాయి కాలేజీ హాస్టల్ గదిలోనే ఆత్మహత్య చేసుకోవడం వెనుక పలు అనుమానాలు తెరమీదకొస్తున్నాయి. ఈ అమ్మాయి కూడా ర్యాగింగ్ భూతానికి బలై వుండవచ్చునని భావిస్తున్నట్లు సమాచారం. లేదా ప్రేమ వ్యవహారం, కుటుంబ కలహాల కారణంగా సూసైడ్ చేసుకుందేమోనన్న అనుమానం వ్యక్తం చేస్తున్నారు. వరుసగా కాలేజీల్లో విద్యార్థినులు ఆత్మహత్య చేసుకుంటున్న ఘటనలు చోటు చేసుకుంటుండటంతో విచారణను వేగవంతం చేసినట్లు తెలుస్తోంది.