భారత్ చేరిన సోలార్ విమానం

Posted: 03/11/2015 12:37 PM IST

సౌరశక్తితో నడిచే మొదటి విమానం సోలార్ ఇంపల్స్-2 భారత్ చేరింది. పూర్తి స్థాయి సౌరశక్తినే ఇంధనంగా వాడుకుంటూ ఈ విమానం ప్రపంచాన్ని చుట్టరానుంది. ప్రపంచ మొత్తం తిరిగిన మొదటి సోలార్ విమానంగా సోలార్ ఇంపల్స్-2 చరిత్ర కెక్కనుంది. మన్కట్ విమానాశ్రయం నుండి బయలుదేరిన ఈ విమానం అరేబియా సముద్రాన్ని దాటి గుజరాత్ లోని సర్దార్ వల్లభాయ్ పటేల్ ఇంటర్నేషనల్ ఎయిర్ పోర్టుకు చేరుకుంది. ప్రపంచాన్ని చుట్టి వస్తున్న ఈ విమానానికి సర్దార్ వల్లభాయ్ పటేల్ విమానాశ్రయ సిబ్బంది సాదరంగా స్వాగతం పలికారు. సోలార్ ఇంపల్స్-2 సాధారణంగా 45 కిలోమీటర్ల వేగంతో ముందుకు సాగుతోంది. అయితే సూర్యరశ్మి ఎక్కువైతే మరింత వేగంగా ప్రయాణిస్తుందని తయారీదారులు అంటున్నారు.

సోలార్ ఇంపల్స్-2 ఒక చుక్క కూడా మామూలు ఇంధనాన్ని వాడకుండా ప్రపంచాన్ని చుట్ట రానుంది. 2300 కిలోల ఈ విమానం 17,000 సోలార్ సెల్స్ అమర్చారు. మొత్తం 35,000 కిలోమీటర్ల ప్రయాణాన్ని 12 సార్లు హాల్ట్ చెయ్యనుంది. మొత్తానికి భారతదేశంలొ రెండు చోట్ల సోలార్ ఇంపల్స్-2 కనువిందు చెయ్యనుంది. అహ్మదాబాద్ లో, వారనాసిలో కొంత సేదతీరనుంది. అహ్మదాబాద్ లో రెండు రోజుల పాటు ఉండి, సోలార్ పవర్ గురించి కొంత అవగాహన కల్పించనుంది. మరి ఇన్ని విశేషాలు ఉన్న ఈ సోలార్ ఇంపల్స్-2 ను చూడాలంటే వెంటనే అహ్మదాబాద్ బయలుదేరండి.

- అభినవచారి