నేడు రామానాయుడు అంత్యక్రియలు... షూటింగ్, థియేటర్లు బంద్

Posted: 02/19/2015 10:07 AM IST

తెలుగు చలన చిత్ర ప్రముఖ నటుడు, నిర్మాత, దాదా సాహెబ్ ఫాల్కే అవార్డు గ్రహీత, మూవీ మొఘల్ డా. డి.రామానాయుడు నిన్న మరణించిన విషయం తెలిసిందే. ఈరోజు మధ్యాహ్నం 3 గంటలకు రామానాయుడు స్టూడియోలో రామానాయుడు గారి పార్థివదేహానికి అంత్యక్రియలు నిర్వహించనున్నారు. ప్రస్తుతం రామానాయుడు గారి పార్థివదేహాన్ని అభిమానులు, జనాల సందర్శనార్థం రామానాయుడు స్టూడియోకు తరలించారు.

తెలుగు సినీ ఇండస్ట్రీకి ఎనలేని కృషి చేసిన రామానాయుడు మనమధ్య లేకపోవడం చాలా బాధాకరం. కేవలం తెలుగులోనే కాకుండా దాదాపు అన్ని భాషలలో సినిమాలను నిర్మించి గిన్నిస్ రికార్డులో స్థానం దక్కించుకున్నారు. రామానాయుడు గారు స్థాపించిన సురేష్ ప్రొడక్షన్స్ బ్యానర్లో వచ్చిన సినిమాల ద్వారా ఎంతో మంది నటీనటులు, దర్శకులు, సాంకేతికనిపుణులు ఇండస్ట్రీకి పరిచయమయ్యారు.

రామానాయుడు మృతిపట్ల తెలుగు సినీ ఇండస్ట్రీ తీవ్ర దిగ్ర్భాంతి చెందింది. అందువల్ల ఈరోజు షూటింగ్, థియేటర్లు స్వచ్ఛందంగా మూసివేస్తున్నారు. రామానాయుడు గారు ఎక్కడ వున్నా కూడా ఆయన ఆత్మకు శాంతి చేకూరాలని కోరుకుందాం.